Միջազգային դիւանագիտական ջանքերը կը շարունակուին Լիբանանի մէջ հրադադար հաստատելու առումով եւ այսօր Լիբանան կը ժամանէ ամերիկացի պատուիրակ Ամուս Հոքշթայն, որ պիտի տեսակցի խորհրդարանի նախագահ Նեպիհ Պըրրիի հետ: Ան նախքան իր այցելութիւնը յայտնեց, որ Լիբանանի մէջ բանակցային առաստաղը 1701-ն է: «Նաշրա»-ի աղբիւրները նշեցին, որ այցելութեան նպատակը նոր գաղափարներ ներկայացնելն է, սակայն միւս կողմէ կայ նաեւ Իսրայէլի պատասխան յարձակումը Իրանի դէմ: Ըստ «Աքսիոս»-ի, Պլինքըն Երեքշաբթի օր շրջանային շրջապտոյտի ծիրին մէջ Իսրայէլ պիտի այցելէ եւ պիտի քննարկէ Կազայի մէջ իրավիճակը ու Լիբանանի մէջ պատերազմը:
Շաբաթավերջին իսրայէլեան օդուժը բուռն յարձակում գործեց Պէյրութի հարաւային արուարձանին վրայ: Իսրայէլեան իրերայաջորդ յարձակումներ գործուեցան հարաւային Լիբանանի Քֆարշուպա շրջանին եւ Սուր քաղաքին վրայ: Իսկ Ճիւնիի շրջանին մէջ իսրայէլեան անօդաչու սարքը յարձակում գործեց ինքնաշարժի մը վրայ, որուն ուղեւորները խոյս տուին ինքնաշարժէն մօտակայ պարտէզներուն մէջ: Անօդաչու սարքը երկրորդ հարուածով սպաննեց փախուստ տուողները: «Իմամ Խումէյնի» կեդրոնը գուժեց Մաասումա Քարպասիի եւ անոր ամուսինին Ռիտա Աուատայի սպանութիւնը Ճիւնիի մէջ:
Հըզպալլա մեծաթիւ հրթիռներով հրթիռակոծեց Հայֆայի հիւսիսը գտնուող Քրիոթը, Հայֆայի արեւելքը գտնուող «Նաշեր» ռազմակայանը, արեւելեան Գալիլիան: Իսրայէլեան բանակը յայտարարեց, որ երէկ Հըզպալլա 160 հրթիռներ արձակեց:
Լիբանանեան բանակը երէկ յայտարարեց, որ Իսրայէլ Այն Ըպըլ-Հանին ճամբուն վրայ յարձակում գործած է լիբանանեան բանակի մեքենայի մը վրայ, որուն հետեւանքով արձանագրուած են երեք նահատակներ:
