Իտալիոյ վարչապետ Ճիորճիա Մելոնի երէկ այցելեց Պէյրութ, ուր իր լիբանանցի պաշտօնակից Նեժիպ Միքաթիի հետ քննարկեց ապահովական զարգացումները, Լիբանանի դիմագրաւած մարտահրաւէրները եւ երկու երկիրներուն յարաբերութիւնները: Մելոնի ապա կտրականապէս անընդունելի համարեց ԵՈՒՆԻՖԻԼ-ի խաղաղապահներուն թիրախաւորումը, պահանջելով երաշխաւորել միջազգային ուժերուն անվտանգութիւնը: Իսկ վարչապետի պաշտօնակատար Միքաթի շեշտեց, որ դիւանագիտական լուծումը պէտք է յաղթէ պատերազմին, պահանջելով, որ առաջին հերթին Իսրայէլ վերջ տայ յարձակումներուն եւ գործադրէ ՄԱԿ-ի 1701 բանաձեւը:
Վարչապետի պաշտօնակատար Նեժիպ Միքաթի արտաքին գործերու նախարարի պաշտօնակատար Ապտալլա Պու Հապիպին յանձնարարեց նախարարութիւն կանչել Իրանի դեսպանութեան գործակատարը եւ տեղեկութիւններ պահանջել Իրանի խորհրդարանի նախագահին վերջին յայտարարութիւններուն առնչութեամբ, ուր Քալիպաֆ ենթադրաբար պատրաստակամութիւն յայտնած էր Ֆրանսային հետ քննարկելու Լիբանանի մէջ 1701 բանաձեւի գործադրութիւնը: Միքաթի զարմանք յայտնեց Քալիպաֆին վերագրուած յայտարարութիւններուն վերաբերեալ, զանոնք համարելով Լիբանանի նկատմամբ Թեհրանի հոգատարութիւնը պարտադրելու եւ երկրի ներքին հարցերուն միջամտելու անընդունելի փորձ: «Պէյրութ կատարած իր այցելութեան ընթացքին, Իրանի խորհրդարանի նախագահին բացատրեցինք Լիբանանի իւրայատուկ վիճակը եւ շեշտեցինք, որ լիբանանեան իշխանութիւնները կը հաղորդակցին արտերկրի հետ՝ ճնշելու համար Իսրայէլի վրայ, որպէսզի վերջ տայ պատերազմին», ըսաւ Միքաթի:
Նշենք, թէ Քալիպաֆի այս յայտարարութեան մասին հաղորդած էր ֆրանսական «Լօ Ֆիկարօ» թերթը, նշելով խորհրդարանի նախագահը այս մասին ըսած է հարցազրոյցի մէջ: Այսուհանդերձ, Իրանի Արտաքին գործերու նախարարութիւնը երէկ հերքեց, թէ Քալիպաֆ հանդէս եկած է նման յայտարարութիւններով: Ըստ նախարարութեան, Քալիպաֆ պարզապէս վերահաստատած է իր աջակցութիւնը լիբանանցիներուն, կառավարութեան եւ Դիմադրութեան կայացուցած որոշումներուն:
