Համաս շարժումը երէկ պաշտօնապէս գուժեց իր քաղաքական գրասենեակի նախագահ Եահիա Սինուարի մահը՝ Կազայի հարաւային շրջանին մէջ տեղի ունեցած բախումի հետեւանքով: Սինուարը սպաննելու մասին իսրայէլեան կողմը յայտարարած էր նախանցեալ օր: Համասի զինուած թեւ «Քասսամ» եւս գուժեց անոր մահը, աւելցնելով որան այսպիսով մաս կազմած է նահատակուած ղեկավարներու փաղանգին: «Մեր ժիհատի երթը պիտի չդադրի մինչեւ Պաղեստինի ազատագրութիւնը եւ սիոնիստներու վտարումը մեր հողերէն», հաւաստիացուց «Քասսամ»:
Սինուարի սպանութեան առնչութեամբ, իսրայէլեան լրատուամիջոցներ նշեցին, թէ հրաձգութեան փոխանակումին ընթացքին զինուոր մը ծանրօրէն վիրաւորուած է Համասի ահաբեկուած ղեկավարին եւ անոր թիկնապահներուն կրակոցներով: Նշենք, որ Սինուար երկու օր առաջ ահաբեկուեցաւ Ռաֆահի մերձակայ շրջանի մէջ, ուր հրաձգութեան փոխանակում տեղի ունեցաւ Համասին եւ իսրայէլեան յատուկ ուժերուն միջեւ, որոնք եկած էին ահաբեկելու Սինուարը: Միացեալ Նահանգներու նախագահ Ճօ Պայտըն նշեց, որ Ուաշինկթըն աւելի լաւ ապագայ կը մաղթէ Կազային՝ հեռու Համասի լուծէն եւ Թեհրանի միջամտութիւններէն, իսկ պաշտպանութեան նախարար Լոյտ Ուսթին յայտնեց, որ Սինուարի ահաբեկումը կը համարուի յառաջ ընթանալու մեծ հնարաւորութիւն՝ չէզոքացուցած ըլլալով կարեւոր խոչընդոտ մը: Իսկ Իրանի արտաքին գործերու նախարար Ապպաս Արաքժի յայտնեց, որ Պաղեստինի ազատագրութեան հարցը այսօր աւելի առաւել իրական է քան երբեք:
Ռուսիոյ նախագահութիւնը Կազայի եւ Լիբանանի մէջ տեղի ունեցածը համարեց մարդասիրական մեծ աղէտ, որ Մոսկուայի մէջ լուրջ մտահոգութիւն կը յառաջացնէ Միջին Արեւելքի ապագային առնչութեամբ, որովհետեւ կը սպառնայ քաղաքացիներուն:
