Հարաւի մէջ գործող ԵՈՒՆԻՖԻԼ-ի խաղաղապահ ուժերու բանբեր Անտրէա Թենանթի շեշտեց, որ խաղաղապահները պէտք է մնան Լիբանանի մէջ եւ փորձեն կատարել իրենց պարտականութիւնները, հակառակ կրած կորուստներուն: Խօսելով ԵՈՒՆԻՖԻԼ-ի նկամամբ իսրայէլեան թիրախաւորումին մասին, Թենանթի շեշտեց, որ իրենք հնարաւորութիւն ունէին հակադարձելու որպէս ինքնապաշտպանութիւն, սակայն նախընտրեցին դիմել ինքնազսպումի:
Յաջորդական երրորդ օրն ըլլալով, հարաւային Նապաթիէ քաղաքն ու շրջակայ գիւղերը ենթարկուեցան իսրայէլեան օդային սատիկ հարուածներու: Ժուայայի ռմբակոծումէն մահացաւ երեք հոգի, իսկ Զրարիյէ գիւղին մերձակայ Ուատի Խալիլ շրջանին մէջ՝ երկու: Պեքաայի հիւսիսային հատուածին մէջ իսրայէլեան ծանր հրթիռներու թիրախ դարձան Շըմըսթար եւ Թիպէ գիւղերուն բարձունքները:
Հըզպալլա իր կարգին յայտարարեց անօդաչու սարքերով Սաֆատի մէջ իսրայէլեան ուժերու կուտակումներ թիրախաւորելու մասին, պատճառելով ծանր վնաս: Հըզպալլայի հրետանային եւ հրասանդային հարուածները կեդրոնացան նաեւ Քֆարքիլայի սահմանային գօտիին վրայ, ուրկէ անցնող օրերուն թշնամի ուժերը կազմակերպած էին ներթափանցումի շարք մը փորձեր: Հըզպալլա յայտարարեց նաեւ հակաօդային հրթիռով մը իսրայէլեան անօդաչու սարք մը լիբանանեան օդային տարածքէն հեռացնելու մասին: Իսրայէլեան բանակը խոստովանեցաւ, թէ անցնող 24 ժամերու ընթացքին վիրաւորուած է առնուազն 53 զինուոր՝ մեծամասնութիւնը Լիբանանի հարաւային շրջաններուն մէջ: Ըստ Իսրայէլի զինուած ուժերու սպայակոյտի պետ Հերցի Հալեւիին, Հըզպալլա ցարդ կորսնցուցած է շուրջ 1500 կռուող:
