Լիբանանեան եւ Կազայի ճակատներուն վրայ շարունակուող պատերազմի սաստկացումի լոյսին տակ, վերջին օրերուն բազմացան կեղծ ահազանգերը եւ յարանուանական լարուածութիւն յառաջացնելու միտումով տարածուած լուրերը, որոնք մասնաւորաբար կը տարածուին համացանցային լրատուամիջոցներով եւ ընկերային հաղորդակցութեանց ցանցերով: Այս առումով, լիբանանեան բանակի հրամանատարութիւնը ահազանգեց, որ «թշնամին կը շարունակէ լիբանանցիներուն միջեւ սեպ խրելու եւ ներքին խռովութիւններ յառաջացնելու փորձերը՝ տարաձայնութիւններ տարածելով եւ լարուածութիւնը սրելով: Ուստի, անհրաժեշտ է տեղի չտալ այդ փորձերուն եւ տարաձայնութիւններ տարածելէ զերծ մնալ ու պատասխանատու վերաբերմունք դրսեւորել, որպէսզի կարելի ըլլայ տապալել իսրայէլեան դաւը», նշուեցաւ բանակի յայտարարութեան մէջ:
Ազգային ազատ հոսանքի նախագահ Ժըպրան Պասիլ կոչ ուղղեց ամէն գնով խուսափելու քաղաքացիական պատերազմի վատնգէն: «Ոչ մէկ կողմ պէտք է պետութենէն ուժեղ ըլլայ Լիբանանի մէջ», ըսաւ Պասիլ՝ աւելցնելով, որ նոր նախագահի ընտրութիւնը կրնայ դրական նշան տալ հաստատութիւններու գործունէութիւնը վերականգնելու մասին:
Իսկ Լիբանանեան ուժեր կուսակցութեան նախագահ Սամիր Ժաաժա դիտել տուաւ, որ Հըզպալլայի ուժերուն մնացորդացը այժմ կը կառավարուի իրանցի սպաներու ցուցմունքներով:
Ամերիկեան Սպիտակ տունը յայտարարեց, թէ Ուաշինկթըն այժմ ի վիճակի չէ լուրջ բանակցութիւն վարելու Կազայի մէջ զինադադար յայտարարելու ուղղութեամբ:
