Իսրայէլի վարչապետ Պենիամին Նեթանիահու յայտնեց, որ իր ուժերը ռուսական «արդիական» զէնքեր յայտնաբերած են Լիբանանի հարաւը գտնուող Հըզպալլայի զինապահեստանոցներուն մէջ: Ան ընդգծեց, որ իր երկիրը չի ցանկար «նոր քաղաքացիական պատերազմ» բռնկի Լիբանանի մէջ։
Ֆրանսական «Լը Ֆիկարօ» թերթին տուած իր հարցազրոյցին մէջ Նեթանիահու յիշեցուց, որ 2006 թուականին ՄԱԿ-ի Անվտանգութեան խորհուրդին կողմէ ընդունուած 1701 բանաձեւը միայն լիբանանեան բանակին թոյլ կու տայ զէնք կրել «Լիթանի» գետէն դէպի հարաւ գտնուող տարածքներուն մէջ։ Սակայն այս տարածքին մէջ Հըզպալլան փորած է հարիւրաւոր գետնափոր փապուղիներ եւ թաքստոցներ, ուր իրենք նոր յայտնաբերած են ռուսական արդիական մեծ քանակութեամբ զէնք: Ան պնդեց, որ Լիբանանի մէջ քաղաքացիական նոր պատերազմի բռնկումը ողբերգութիւն պիտի ըլլայ: Իրենք, ի հարկէ, նման պատերազմ հրահրելու նպատակ չունին, եւ Իսրայէլը մտադիր չէ միջամտելու Լիբանանի ներքին հարցերուն: Ան աւելցուց, որ իրենց միակ նպատակն է թոյլ տալ, որ լիբանանեան սահմանի երկայնքով ապրող իրենց քաղաքացիները վերադառնան իրենց տուները եւ ապահով զգան: Ամերիկեան «Տը Ուաշինկթըն Փոսթ» թերթը, յղում կատարելով իսրայէլացի պաշտօնատարներուն, յայտնեց, որ Իսրայէլի կողմէ Լիբանան ներխուժելու ժամանակ ռուսական եւ չինական հրետանային զէնքեր յայտնաբերուած են։
