Իրանի յեղափոխական պահակագունդի հրամանատար, հազարապետ-զօրավար Հիւսէյն Սալամի, Յեղափոխական պահակագունդին մէջ խորհրդական գնդապետ-զօրավար Ապպաս Նելֆրոշանի յուղարկաւորութեան ժամանակ իր ելոյթին մէջ ըսաւ, որ թշնամին սխալ թիրախաւորում կատարած է Դիմադրութեան առաջնորդները ահաբեկելով եւ կը կարծէ, թէ իրենք պիտի չպատասխանեն։ Ան յայտնեց Իսրայէլին, որ «Ճշմարիտ խոստում 2» գործողութիւնը պարզապէս նախազգուշացում էր:
Ան աւելցուց, որ իրենք կը վստահեցնեն հակառակորդին, որ ցաւալի հարուածներ կրնան հասցնել անոնց, եթէ յարձակի իրենց թիրախներուն վրայ, իսկ եթէ թշնամին թիրախաւորէ իրենց հողերը, իրենք պիտի թիրախաւորեն նաեւ անոնց հողերը, եւ ան գիտէ, որ իրենք կը կատարեն իրենց խոստումը։
Սալամի մատնանշեց, որ իրենք գիտեն թշնամիին տկար կողմերը, եւ ան քաջատեղեակ է այդ մասին, աւելցնելով, որ իրենց թշնամիները կորուստներ կը կրեն իրենց սխալ հաշուարկներուն պատճառով:
