Լիբանան երէկ թեւակոխեց 17 Հոկտեմբեր 2019-ի յեղափոխական շարժման հինգամեակը, որուն յաջորդեցին զանազան ապահովական, առողջապահական, տնտեսական վերիվայրումներ, սակայն լիբանանցին իր հողին կառչած մնալու սէրէն ու կապուածութենէն մղուած իր երկիրը ամէն ինչէ գերիվեր դասեց: Իսկ վերջերս Լիբանանի դէմ Իսրայէլի սանձազերծած պատերազմը լիբանանցիին ստիպեց անգամ մը եւս ըմպելու անորոշութեան, վախի եւ կորուստի (մարդկային, հողի, տունի) դառն բաժակը:
Երէկ առաւօտէն մինչեւ երեկոյ իսրայէլեան օդային ուժերը իրերայաջորդ յարձակումներ գործեցին Այթա Շաապի, Պեքաայի Թըմնին եւ Սըրհին գիւղերուն, Սուրի, Հաուշի եւ Պըրժ Շիմալիի վրայ:
Հըզպալլա իր կարգին հարուածեց Լապունա բարձունքին վրայ իսրայէլեան երկու «Միրքաւա» հրասայլեր, որոնք հրկիզուած են, իսկ անձնակազմը սպաննուած եւ վիրաւորուած է: Երէկ Լիբանանէն Հայֆայի եւ Գալիլիոյ դէմ 30 հրթիռներ արձակուած են:
Իսրայէլեան լրատուամիջոցները հաղորդեցին, որ իսրայէլեան բանակը իր վերահսկողութեան տակ առած է հարաւային Լիբանանի առնուազն 9 քաղաքներ՝ հիւսիսէն Մէյս Ալ Ժապալէն մինչեւ հարաւը գտնուող Քաթամոն գիւղերը, ուր ուժերը ներթափանցած են մինչեւ 4,7 քիլոմեթր խորութեամբ լիբանանեան տարածք։
ԵՈՒՆԵՍՔՕ-ն խոր մտահոգութիւն յայտնեց Լիբանանի մէջ զարգացումներուն լոյսին տակ եւ կոչ ուղղեց անմիջական ու մնայուն զինադադար հաստատելու:
ՄԱԿ-ի Համաշխարհային սննդեղէնի պաշարի գործադիր տնօրէնի տեղակալը երէկ յայտարարեց, որ Լիբանանի մէջ վատ կացութիւն կը տիրէ եւ կրնայ աւելի վատանալ
