Իսրայէլեան երէկուայ կատաղի հարուածներուն լոյսին տակ, Լիբանանի մէջ ՄԱԿ-ի յանձնակատարը դատապարտեց ռմբակոծումի ալիքները եւ ահազանգեց, որ հարաւի մէջ տեղի ունեցածը կը համարուի միջազգային մարդասիրական օրէնքի անընդունելի խախտում:
Վարչապետ Նեժիպ Միքաթի դատապարտեց քաղաքացիները թիրախաւորող իսրայէլեան յայրձակումները եւ հարց տուաւ, թէ արդեօ՞ք տակաւին օգտակար է դիմել ՄԱԿ-ին եւ պահանջել զինադադար: Արտաքին գործերու նախարարութիւնը իսրայէլեան ոտնձգութիւններուն առնչութեամբ նոր բողոք մը ներկայացուց ՄԱԿ-ի Ապահովութեան խորհուրդին, միջազգային ընտանիքէն պահանջելով ճնշում բանեցնել Իսրայէլի նկատմամբ, որպէսզի անյապաղ վերջ տայ թշնամական արարքներուն:
Պքըրքիի մէջ երէկ տեղի ունեցաւ քրիստոնեայ եւ մահմետական յարանուանութիւններու հոգեւոր պետերու եւ ներկայացուցիչներու գագաթաժողով, որուն եզրափակիչ հաղորդագրութեան մէջ ՄԱԿ-ի Ապահովութեան խորհուրդին կոչ ուղղուեցաւ իսկոյն ժողով գումարելու եւ պահանջելու զինադադար: Ժողովականները խստիւ դատապարտեցին իսրայէլեան ոճրագործութիւնները եւ միջազգային ընտանիքին լռութիւնը, իրենց զօրակցութիւնը յայտնելով տեղահանուած ու տառապող լիբանանցիներուն: «Իրենց միասնականութեամբ եւ համագործակցութեամբ լիբանանցիները կրնան դիմակայել թշնամական արշաւը եւ զսպել թշնամին», նշուեցաւ հոգեւոր պետերու յայտարարութեան մէջ, ուր յանձնառութիւն յայտնուեցաւ Թայէֆի ուխտին, Լիբանանի Սահմանադրութեան եւ պետական հաստատութիւններուն՝ որպէս հողերը պաշտպանելու պատասխանատուն:
