Անցնող երկու օրերուն Պէյրութի հարաւային արուարձաններուն մէջ տիրած համեմատական հանդարտութիւնը երկար չտեւեց եւ երէկ վաղ առաւօտեան իսրայէլեան օդուժը մեծ հարուած տուաւ Հարէթ Հրէյք շրջանին, բնակիչներուն ուղղուած սպառնալիքներէն կարճ ժամանակ ետք: Իսրայէլեան բանակը յայտարարեց, թէ յարձակումին թիրախն էր «Հըզպալլայի ռազմավարական զինատեսակներու ստորգետնեայ մթերանոց մը»: Նոյնպէս առաւօտեան ժամերուն, իսրայէլեան ռազմական օդանաւերը հսկայածաւալ հարուած տուին Նապաթիէ քաղաքի շարք մը թաղամասերու՝ ներառեալ քաղաքապետարանը, ուր կը գումարուէր մարդասիրական օգնութիւններու համակարգումի ժողով մը: Հարուածէն մահացան քաղաքապետը եւ 7 անձեր՝ ներառեալ քաղաքացիական անվտանգութեան պաշտօնեայ մը: Իսկ հարաւի սահմանագիծին վրայ, իսրայէլեան յատուկ ուժեր ականահարելով գրեթէ ամբողջութեամբ պայթեցուցին առաջնագիծի Մհայպիպ գիւղը եւ տեսագրութիւնը տարածեցին համացանցի վրայ: Երէկուայ յարձակումներու շարքին, Պեքաայի մէջ առաջին անգամ ըլլալով ռմբակոծուեցաւ Պաալպաք գաւառի Եամմունէ գիւղը, ուր ինկաւ երկու զոհ եւ 15 վիրաւոր: Մերձակայ Եունինի մէջ վիրաւորուեցաւ վեց մարդ, իսկ երկու մարդ մահացաւ Ռայաք-Պաալպաք ճամբուն թիրախաւորումէն: Հարաւի մէջ երեք մարդ մահացաւ եւ 54 ուրիշներ վիրաւորուեցան Քանայի ռմբակոծումին պատճառով: Չորս մարդ ալ երեկոյեան մահացաւ հարաւային Հապուշի ռմբակոծումէն: Ժուայա գիւղին մէջ տարուած շտապ օգնութեան աշխատանքներուն ընթացքին վիրաւորուեցաւ Կարմիր խաչի երկու կամաւոր:
Իսրայէլեան բանակը յայտարարեց, թէ անցնող 24 ժամերուն ընթացքին աւելի քան 140 թիրախ հարուածած է լիբանանեան առնուազն 50 շրջանի մէջ: Իսկ Հըզպալլա յայտարարեց իսրայէլեան սահմանային դիրքերը եւ բնակավայրերը ռմբակոծելու մասին, առ ի հակադարձութիւն քաղաքացիներու նկատմամբ գործուած ոճիրներուն: Ըստ Հըզպալլային, «զինեալ ծանր բախումները շարունակուած են սահմանային Ատէյսի եւ Քաուզահ շրջաններուն մէջ, ուր թշնամի ուժերը կրած են ծանր կորուստներ»: Իսրայէլեան կողմը խոստովանեցաւ հինգ մահի եւ 15 վիրաւորի մասին, մինչ շտապ օգնութեան ծառայութիւնը նշեց, թէ Մաժտ Քրումի մէջ Հըզպալլայի հրթիռներէն ինկած է չորս վիրաւոր:
Առողջապահութեան նախարարութեան արտակարգ գործողութիւններու կեդրոնը յայտարարեց, թէ իսրայէլեան ոտնձգութիւններու սկիզբէն ի վեր զոհուած է 2367 մարդ, իսկ վիրաւորներուն թիւը հատած է 11 հազարը:
