Ղազախստանի նախագահ Քասիմ Ժոմարթ Թոքայեւ Հայաստանի նախագահ Վահագն Խաչատուրեանի հետ հանդիպման ժամանակ յայտնեց, որ իր երկիրը պատրաստակամ է շարունակելու Ալմաթիի հարթակը տրամադրել Հայաստանի եւ Ատրպէյճանի միջեւ խաղաղութեան պայմանագիրի կնքման շուրջ բանակցութիւններու համար։
«Ղազախստանը հայ ժողովուրդի նկատմամբ ջերմ զգացումներ ունի: Ղազախստանի համար Հայաստանը յուսալի եւ ժամանակի ընթացքին փորձուած սերտ գործընկեր է։ Երկու ժողովուրդները կապուած են ամուր բարեկամական կապերով, ընդհանուր պատմութեամբ եւ համանման մշակութային ու մարդասիրական արժէքներով», ըսած է Թոքայեւ եւ գոհունակութիւն յայտնած, որ երկկողմանի յարաբերութիւնները յարաշարժօրէն կը զարգաանան բոլոր ոլորտներուն մէջ։
Յիշեցնենք, որ այս տարուան Մայիսին Ալմաթիի մէջ կայացած է Հայաստանի եւ Ատրպէյճանի արտաքին գործերու նախարարներուն երկկողմանի հանդիպումը, որուն ընթացքին Արարատ Միրզոյեանն ու Ճէյհուն Պայրամովը քննարկած են «Խաղաղութեան եւ միջպետական յարաբերութիւններու հաստատման մասին երկկողմանի համաձայնագրի» նախագիծը։
