Վարչապետի պաշտօնակատար Նեժիպ Միքաթի յայտնեց, որ միջազգային հաղորդակցութիւններ կատարուած են հրադադարի հասնելու, բանակին դերը զօրացնելու եւ 1701 բանաձեւը իրականացնելու համար: «Ժազիրա» պատկերասփիւռի կայանին տուած հարցազրոյցի ընթացքին ան ընդգծեց, որ իրենք կը ձգտին ՄԱԿ-ի Անվտանգութեան խորհուրդին կողմէ հրադադարի հարցը ներկայացնելէն առաջ միջազգային հաւանութիւն ստանալ, յատկապէս որ երկիրներուն մեծ մասը զօրավիգ է Լիբանանին: Ան շեշտեց, որ անցեալ շաբաթ ամերիկեան իշխանութիւններու հետ հաղորդակցութեան ընթացքին որոշ երաշխիք ստացան Պէյրութի հարաւային արուարձաններուն եւ Պէյրութի մէջ իսրայէլեան լարուածութեան մագլցումը նուազեցնելու առումով: Այս առնչութեամբ ամերիկացիները լրջօրէն կը փորձեն ճնշում բանեցնել Իսրայէլի վրայ՝ հրադադարի հասնելու համար:
Միքաթին մատնանշեց, որ օդակայանին մէջ ձեռնարկուած խիստ միջոցառումները Իսրայէլի կողմէ շահագործուող պատրուակներէն խուսափելու համար է: Ան ըսաւ, որ անցեալ շաբաթ Նախարարաց խորհուրդը որոշում կայացուց ՄԱԿ-ի Անվտանգութեան խորհուրդին ներկայացնել հրադադար հաստատելու որոշումի առաջարկը: Ան միաժամանակ հաստատեց 1701 բանաձեւի իրականացումը եւ բանակը հարաւ ուղարկելու իրենց լիակատար յանձնառութիւնը: Միքաթի յայտնեց, որ 1701 բանաձեւը միակ լուծումն է: «Ամփոփելու համար ներկայ իրավիճակը, պէտք է իրականանայ այս բանաձեւը, մանաւանդ որ բանակը պատրաստ է հարաւի մէջ իր դիրքերը զօրացնելու ԵՈՒՆԻՖԻԼ-ի ուժերուն հետ», ըսաւ վարչապետի պաշտօնակարը եւ ողջունեց ԵՈՒՆԻՖԻԼ-ին մաս կազմող բոլոր երկիրները, ի մասնաւորի եւրոպական երկիրները, եւ Իսրայէլի սպառնալիքները մերժելու իրենց դիրքորոշումը: Ան ըսաւ, որ Իսրայէլի ամբարտաւանութիւնը չի հարցներ խաղաղապահ ուժերուն մասին, որովհետեւ ան կը մերժէ խաղաղութիւնը: Ան նշեց, որ ԵՈՒՆԻՖԻԼ-ը զիրենք տեղեակ պահած է, որ պիտի չզիջի իր դիրքերը:
