Երէկ լուսաբացին Պաալպեք-Հերմել քաղաքներուն մէջ իսրայէլեան ռազմական օդանաւերը թիրախ դարձուցին Հերմելը, Ալայնը, Շաաթը, Եունինը, Պաալպեքը, Տուրուսը եւ Պաալպեքի հարաւային մուտքը: Պաալպեքի քաղաքապետ Մուսթաֆա Շալ հաստատեց, որ Տուրուսի հնագոյն գմբէթի թագը վնասուած է՝ անցեալ գիշեր գմբէթին յարող տարածքին վրայ տեղի ունեցած յարձակման հետեւանքով:
Իսրայէլեան օդուժը բուռն յարձակում գործեց նաեւ Նապաթիէի եւ շրջակայ գիւղերուն վրայ: Ըստ իսրայէլեան բանակի ձայնասփիւռի կայանին, հինգերորդ զօրք մը սկսած է մասնակցիլ հարաւային Լիբանանի ցամաքային գործողութիւններուն: Ռայաքի մէջ իսրայէլեան օդային յարձակումի մը պատճառով արձանագրուեցան չորս զոհ եւ քսան վիրաւոր: Հըզպալլայի մարտիկները երէկ իսրայէլեան անօդաչու «Հերմեզ 450» սարքը վար առին: Իսրայէլեան բանակը յայտարարեց, որ 15 հրթիռներ արձակուած են Լիբանանէն: Այս հրթիռներէն մէկը թիրախաւորեց Հայֆայի արեւելքը գտնուող շէնք մը, ուր արձանագրուեցան վիրաւորներ: «Ուոլ Սթրիթ Ճըրնըլ» մէջբերեց իսրայէլացի պաշտօնատարներու խօսքերը, ըստ որոնց, հազարաւոր զինուորներ մասնակցած են ցամաքային արշաւին Լիբանանի մէջ, ամէնօրեայ դրութեամբ: Անոնք նշած են, որ Լիբանանէն Իսրայէլ տարած են բեռնատարներ, որոնք զէնք կը տեղափոխէին, ընդ որում՝ հրետանային հրթիռներ։
