Նախանցեալ օրուան հիւսիսային Լիբանանի Զղարթա գաւառի Այթօ գիւղին վրայ իսրայէլեան օդուժին 22 քաղաքացիի կեանք խլած յարձակման դատապարտութիւնները երէկ շարունակուեցան, նոյնիսկ ՄԱԿ-ի մակարդակով: Արդարեւ ՄԱԿ-ի Մարդու իրաւունքներու գերագոյն յանձնակատարը յայտնեց, որ ստացած է տեղեկութիւններ, ըստ որուն, Լիբանանի հիւսիսը գտնուող Այթօ գիւղի 22 նահատակներուն մէջ կան 12 կին եւ երկու երեխայ: ՄԱԿ-ի յանձնակատարի խօսնակ Ճերեմի Լորենս Ժընեւի մէջ լրագրողներու հետ զրոյցի ընթացքին, Այթօ գիւղին վրայ կատարուած յարձակումին մասին ըսաւ, որ իրենք գիտեն, որ հարուածը եղած է չորս յարկանի բնակելի շէնքի վրայ: Հաշուի առնելով այս գործօնները, իրենք իրական մտահոգութիւններ ունին միջազգային մարդասիրական իրաւունքի, պատերազմի օրէնքներու եւ համաչափութեան սկզբունքներու առնչութեամբ, եւ ան յորդորեց հետաքննել միջադէպը։
