Երէկ, 13 Հոկտեմբերի առաւօտեան, Պէյրութի Նոր Հաճըն թաղամասի Սուրբ Գէորգ եկեղեցւոյ մէջ տեղի ունեցաւ սուրբ եւ անմահ պատարագ եւ հոգեհանգիստ, նուիրուած Հաճնոյ Հերոսամարտի 104-ամեակին, ինչպէս նաեւ Սբ. Գէորգ եկեղեցւոյ հիմնադրութեան 86-ամեակի անուանակոչութեան, մասնակցութեամբ եկեղեցւոյ «Գայիանէ» երգչախումբին: Պատարագը հանդիսապետեց եւ քարոզեց Կիլիկիոյ Կաթողիկոսութեան միաբաններէն Հոգշն. Տէր Առաքել Աբղ. Գատեհճեան: Ս. եւ անմահ պատարագէն ու հոգեհանգստեան պաշտօնէն ետք, տեղի ունեցաւ աւանդական մատաղօրհնէք, ապա մատաղը բաժնուեցաւ հաւատացեալ ժողովուրդին:
Հուսկ, ներկաները ուղղուեցան եկեղեցւոյ սրահը, Հաճնոյ հերոսամարտի նահատակներուն յիշատակը ոգեկոչելու եւ Սբ. Գէորգ Եկեղեցւոյ 86-ամեակին նուիրուած կարկանդակը հատելու համար: Զոյգ իրադարձութիւններուն խորհուրդին մասին Սբ. Գէորգ եկեղեցւոյ թաղականութեան եւ Հաճնոյ Հայրենակցական Միութեան վարչութեան անունով խօսք յղեց «Արարատ» օրաթերթի տնօրէն ընկեր Նազօ Ճէրէճեան:
Իսկ նախորդող օրը՝ Շաբաթ, 12 Հոկտեմբերին, Սուրբ Գէորգ եկեղեցւոյ շրջափակին մէջ տեղի ունեցաւ աւանդական մատաղի պատրաստութիւն, կազմակերպութեամբ Հաճնոյ Հայրենակցական Միութեան վարչութեան, համագործակցութեամբ Սբ. Գէորգ եկեղեցւոյ Թաղական խորհուրդին, Տիկնանց յանձնախումբին եւ Ս.Դ.Հ.Կ. «Ժիրայր-Մուրատ» մասնաճիւղի վարչութեան: (Մանրամասնութիւնները մեր վաղուան թիւով):
