Շարունակաբար ընդարձակելով լիբանանեան ռմբակոծուող շրջաններուն աշխարհագրութիւնը, իսրայէլեան ռազմական օդանաւեր երէկ չորս բնակարաններէ բաղկացած կառոյց մը կործանեցին հիւսիսային Զղարթա գաւառի Այթօ բնակավայրին մէջ, ուր ապաստանած էին քանի մը տեղահանուած ընտանիքներ: Լիբանանեան կարմիր խաչը հաղորդեց, թէ հարուածէն մահացած է 18 մարդ եւ չորս ուրիշներ վիրաւորուած են, մինչ այլ տեղեկութիւններ նշեցին, որ հարուածին թիրախը Հըզպալլայի անդամ Ահմատ Ֆաքիհն էր: Իսրայէլեան օդուժի յարձակումներէն երէկ բաժին հասաւ նաեւ Պաալպաքի արեւմտեան Պաուատի եւ Պէյթ Մշէյք շրջաններուն, իսկ Արեւմտեան Պեքաայի մէջ ռմբակոծուեցաւ Քըլիա գիւղը: Պեքաայի մէջ թիրախաւորուեցաւ Այն գիւղը, որուն հետեւանքով տուժեց շրջանէն անցնող եւ օգնութիւններ փոխադրող բեռնակառք մը: Հարաւի մէջ, ծանր պայթումներ լսուեցան Եահմոր գիւղի Հըզպալլայի առողջապահական կառոյցէն:
Մարատա հոսանքի նախագահ Սլէյման Ֆրանժիէ մեկնաբանեց Այթօ գիւղին մէջ տեղի ունեցած միջադէպը, դիտել տալով, որ Զղարթա գաւառը եւս մաս կը կազմէ Լիբանանին եւ թիրախ է իսրայէլեան ցեղասպան պատերազմին: Ֆրանժիէ ոտնձգութիւններուն պատասխանատուն համարեց Իսրայէլի վարչապետ Պենիամին Նեթանիահուն ու անոր կառավարութիւնը: «Անոնք որոնք կը փորձեն քաղաքական չարաշահումներու ենթարկել տեղահանուածները եւ կը յայտարարեն, թէ զէնք պահուած է գիւղերուն եւ բնակարաններուն մէջ, անոնց կ’ըսենք, որ դիմադրութիւնը ահաբեկչութիւն չէ», ըսաւ Ֆրանժիէ՝ աւելցնելով, որ իրենց ունեցած զէնքը անձնական պաշտպանութեան համար է ու եթէ պիտի կռուին, ապա այդ պիտի կատարեն հարաւի մէջ՝ զօրակցելով դիմադրութեան:
