ՃԻՏԱՊՈՒՐ

(7-8 անձի)

ԲԱՂԱԴՐՈՒԹԻՒՆ

– 5 գաւաթ կորկոտ

– 1 քկ ոչխարի ճիտի միս կտորներու վերածուած

– 1/2 քկ կովու ճիտի միսի կտորներ եւ առատ ոսկոր

– 2 սոխ՝ շատ մանր մանրուած

– Աղ

– Սեւ փոշի պղպեղ

– Հալած կարագ կամ արդար իւղ

– Կարմիր փոշի պղպեղ

– 1 ցպիկ կասիա

– 6-7 գնդիկ անուշ «պահար»

– 5-6 հատիկ «հել»

ՊԱՏՐԱՍՏՈՒԹԻՒՆ

Միսը կտորներու վերածել, լուալ եւ խոշոր կաթսայի մէջ դնել ու առատ ջուր աւելցնել եւ սկսիլ եփել: Վերցնել վրայի փրփուրը, աւելցնել աղը, կասիան, «հել»ը եւ անուշ «պահար»ը:

Միսը եփել մինչեւ որ լման կակուղնայ (կարելի է ճնշեփ գործածել): Ծակտիկաւոր դգալով մէկդի վերցնել ու զայն լաւ մը մաքրել, ապա մանր-մանր փետտել եւ իւղոտ մասերը հանել։ Սեւ պղպեղով եւ սոխով լաւ մը շաղել ու մէկդի ձգել:

Կորկոտը լուալ եւ ցամքեցնել, ապա առատ մսաջուրին մէջ դնել: Աւելցնել միս–սոխ բաղադրութիւնը եւ բոլորը միասին միջակ կրակի վրայ դնել եւ փայտէ դգալով շարունակ խառնելով եփել: Եռալէն ու պղպջակներ կազմուելէն ետք, թեթեւցնել կրակը ու շարունակել խառնելով եփել (2 – 2 1/2  ժամ), մինչեւ բաղադրութիւնը կպչուն ամբողջութեան մը վերածուի, կորկոտը լման եփի ու կաթսային բաղադրութիւնը պղպջակներու ձեւով կաթսայէն դուրս սկսի ցատկել։

Հրամցնել հալած իւղով ու փոշի կարմիր պղպեղով:

ԾԱՆՕԹ. Հայկական տոհմիկ կերակուր է, որ ընդհանրապէս կը պատրաստուի երբ ընտանիքի անդամները մէկտեղուած ըլլան: Այս ճաշի պատրաստութեան

համար թելադրելի է ճիտի միսի գործածութիւնը, քանի որ կպչուն է: Ճիտապուրը խառնելու ժամանակ կարելի է դաստակը փաթթել խոհանոցի լաթով խուսափելու համար այրուցքներէ: