Հայաստանի մէջ այսօր կը նշուի Ծխախոտի դէմ պայքարի ազգային օրը: 2020-ին վաւերացուած էր «Ծխելու հետեւանքով յառաջացած առողջական խնդիրները նուազեցնելու եւ կանխարգելելու» օրէնք մը, որ կը պարտադրէր հիւանդութիւններէ ահազանգող նկարներով օժտել ծխախոտային տեսակներու եւ զանոնք փոխարինող այլ նիւթերուն տուփերը: Այսուհանդերձ, շուկային մէջ տակաւին կան ծխախոտի տուփեր, որոնք նշեալ զգուշացումը չեն կրեր: Ազգային ժողովի Տնտեսական հարցերու յանձնաժողովի նախագահի տեղակալ, երեսփոխան Բաբգէն Թունեան ահազանգեց, թէ այս ոլորտը կարիք ունի լուրջ վերահսկողութեան, որպէսզի գործադրուի օրէնքը:
