Իսրայէլեան թշնամական գործողութիւններու սաստկացումի լոյսին տակ, վարչապետի պաշտօնակատար Նեժիպ Միքաթի ՄԱԿ-ի Ապահովութեան խորհուրդէն պահանջեց անյապաղ կայացնել զինադադարի որոշում: «Հեռախօսազրոյց ունեցաւ Միացեալ Նահանգներու արտաքին գործերու նախարար Անթոնի Պլինքընի հետ ու նկատեցի, որ կը զօրակցին Լիբանանին: Զգալի աշխատանք կը տարուի զինադադարի ուղղութեամբ», ըսաւ Միքաթի, գործող կառավարութեան երէկուայ նիստէն ետք: Վարչապետի պաշտօնակատարը անընդունելի համարեց քաղաքացիական թիրախներու ռմբակոծումը եւ մեծարեց նահատակները, վստահեցնելով որ լիբանանցիները յանձնառու կը մնան իրենց հողին եւ իրաւունքներուն, վերստին պահանջելով գործադրել ՄԱԿ-ի 1701 բանաձեւը՝ ներառեալ լիբանանեան բանակը հարաւի մէջ տեղակայելու անհրաժեշտութիւնը, որուն համար կարիք կայ միջազգային կողմերու աջակցութեան: Միքաթի ցաւ յայտնեց, որ հակառակ արաբական եւ միջազգային կողմերու հետ հաղորդակցութիւններուն, «իսրայէլեան յարձակումները կը շարունակուին եւ Լիբանան լքուած է առանձին, կարծէք արգիլուած է պաշտպանենք մեր արժանապատուութիւնը»:
