«Հիւլէական հնգեակի» յաջորդ հանդիպումը տեղի պիտի ունենայ ՄԱԿ-ի Գլխաւոր վեհաժողովի առաջին կոմիտէի նիստերու շրջանին, յայտնեց Ռուսիոյ արտաքին գործերու փոխնախարար Սերկէյ Ռիապքով: Կը նախատեսուի, որ անիկա տեղի ունենայ յառաջիկայ երկու շաբթուան ընթացքին։ «Հիւլէական հնգեակի» մէջ են Ռուսիան, Մեծն Բրիտանիան, Չինաստանը, Միացեալ Նահանգները եւ Ֆրանսան։
Ռիապքով լրագրողներուն ըսաւ, որ համապատասխան շփումները տեղի կ’ունենան Նիւ Եորքի ՄԱԿ-ի Գլխաւոր վեհաժողովի առաջին կոմիտէի շրջանակին մէջ:
Փոխնախարարը յաջողութիւն մաղթեց Չինաստանին, որ ստանձնած է «Հիւլէական հնգեակի» համակարգողի իրաւունքները։ Ան վստահեցուցած է, որ Փեքինը կրնայ յոյս դնել Մոսկուայի աջակցութեան վրայ «դժուար ժամանակներու» մէջ։
Ռիապքով նաեւ յոյս յայտնեց, որ «արեւմտեան եռեակը» ինքզինք «գոնէ քիչ մը աւելի կառուցողական» կը պահէ։ 2023–2024 թուականներուն «Հիւլէական հնգեակի» ձեւաչափին մէջ համակարգողի դեր ունեցողը Ռուսիան էր։
