Սպիտակ տունը յայտարարեց, որ Միացեալ Նահանգներու նախագահ Ճօ Պայտըն հեռաձայնային հաղորդակցութիւն ունեցած է Իսրայէլի վարչապետ Պենիամին Նեթանիահուի հետ եւ փոխնախագահ Քամալա Հարիսը միացած է զրոյցին, նշելով որ նախագահը հաստատեց իր հաստատակամութիւնը Իսրայէլի անվտանգութեան հանդէպ եւ միանշանակ դատապարտեց 1 Հոկտեմբերին Իրանի կողմէ թեւաւոր հրթիռներով յարձակումը Իսրայէլի վրայ:
Սպիտակ տան յայտարարութիւնը նշեց, որ ինչ կը վերաբերի Լիբանանին, Պայտըն շեշտած է դիւանագիտական լուծման անհրաժեշտութիւնը՝ լիբանանցի եւ իսրայէլացի քաղաքացիներուն անվտանգ վերադարձը իրենց տուները՝ Կապոյտ գիծի երկու կողմերուն, նշելով որ նախագահը նաեւ հաստատեց, որ Իսրայէլի իրաւունքն է իր քաղաքացիները պաշտպանել Հըզպալլայէն, որ միայն անցեալ տարուան ընթացքին հազարաւոր ռումբեր եւ հրթիռներ արձակած է Իսրայէլի ուղղութեամբ: Միաժամանակ ընդգծելով, որ անհրաժեշտ է նուազեցնել վնասը խաղաղ բնակիչներուն, յատկապէս Պէյրութի խիտ բնակեցուած շրջաններուն մէջ:
Ինչ կը վերաբերի Կազայի հատուածին, Պայտըն եւ Նեթանիահուն քննարկած են Համաս-ի պատանդները ազատ արձակելու համար դիւանագիտական ջանքերը վերականգնելու հրատապ անհրաժեշտութիւնը: Պայտըն նաեւ անդրադարձաւ Կազայի մէջ մարդասիրական ճգնաժամին, ինչպէս նաեւ հարաւէն Յորդանան միջանցքը անյապաղ վերակենդանացնելու հրամայականին: Միացեալ Նահանգներու նախագահը մատնանշեց, որ անոնք համաձայնած են սերտ կապի մէջ մնալ յառաջիկայ օրերուն՝ ուղղակիօրէն կամ իրենց ազգային անվտանգութեան անդամներու միջոցով:
Սպիտակ տան մամլոյ քարտուղար Քարին Ժան Փիեռը լրագրողներուն ըսաւ, որ հեռախօսազրոյցը տեւած է մօտ 30 վայրկեան եւ Պայտընի վարչակարգը յոյս ունի զսպել Իսրայէլի պատասխան հարուածները: Սակայն մինչեւ այժմ անոր դիւանագիտական ջանքերը տարածաշրջանին մէջ հիմնականօրէն ձախողած են: Ան ըսաւ, որ պաշտպանութեան նախարար Լոյտ Օսթին այս շաբաթ Ուաշինկթընի մէջ պէտք է հանդիպէր Իսրայէլի պաշտպանութեան նախարար Եոաւ Կալանթի հետ, սակայն Կալանթ յետաձգեց իր այցելութիւնը Միացեալ Նահանգներ։
Նեթանիահուի գրասենեակը «Էյ.Պի.Սի. Նիուզ»-ին հաստատեց, որ նախկին նախագահ Տոնալտ Թրամփ Նեթանիահուի հետ խօսած է մօտ մէկ շաբաթ առաջ: Վարչապետին գրասենեակը յայտնեց, որ Թրամփ իր նախաձեռնութեամբ հեռաձայնած է Նեթանիահուին եւ շնորհաւորած զայն՝ Հըզպալլայի դէմ Իսրայէլի կողմէ իրականացուած վճռական եւ ուժեղ միջոցառումներուն համար:
