ԵՈՒՆԻՖԻԼ յայտարարութեամբ մը հաստատեց, որ երէկ առաւօտեան երկու խաղաղապահ զինուորներ վիրաւորուած են, երբ իսրայէլեան բանակին պատկանող «Մերքաւա» տիպի հրետանին կրակած է Նաքուրայի մէջ ԵՈՒՆԻՖԻԼ-ի դիրքի դիտաշտարակի վրայ՝ ուղղակիօրէն հարուածելով զայն, որ պատճառ դարձաւ, որ աշտարակին վրայ գտնուող երկու զինուորները վար իյնան: Բարեբախտաբար, այս անգամ վնասուածքները լուրջ չեն, բայց անոնք տակաւին հիւանդանոց կը գտնուին։
Ան աւելցուց, որ իսրայէլեան բանակի զինուորները կրակ բացած են նաեւ ՄԱԿ-ի «1-31» Ռաս Նաքուրայի դիրքը, հարուածելով մուտքը, ուր պատսպարուած էին խաղաղապահները, վնաս պատճառելով հաղորդակցութեան սարքաւորումներուն եւ համակարգին։ Իսրայէլեան բանակի անօդաչու սարք մըն ալ նոյնպէս տեսնուեցաւ ՄԱԿ-ի կեդրոնին մէջ մինչեւ դիրքին մուտքը:
Ան շարունակեց, որ նախանցեալ օր իսրայէլեան բանակի զինուորները միտումնաւոր կրակ բացած են ՄԱԿ-ը շրջապատող տեսախցիկներուն վրայ եւ անգործնական դարձուցած են զանոնք:
ԵՈՒՆԻՖԻԼ ըսաւ, որ կը յիշեցնեն իսրայէլեան բանակին եւ բոլոր կողմերուն՝ ՄԱԿ-ի անձնակազմին եւ անոնց գոյքին անվտանգութիւնը ապահովելու եւ ՄԱԿ-ի շէնքերը մշտապէս յարգելու պարտաւորութեանց մասին: ԵՈՒՆԻՖԻԼ-ի խաղաղապահ ուժերը կը գտնուին հարաւային Լիբանան` աջակցելու համար կայունութեան վերադարձին Անվտանգութեան խորհուրդի լիազօրութեան ներքեւ: Միջազգային խաղաղապահ ուժերու վրայ որեւէ կանխամտածուած յարձակում լուրջ խախտում կը նկատուի միջազգային մարդասիրական օրէնքի եւ Անվտանգութեան խորհուրդի 1701 բանաձեւին: Իրենք այս հարցերուն մասին պիտի խօսին իսրայէլեան բանակին հետ:
Միւս կողմէ, Ֆրանսայի Զինուած ուժերու նախարարութիւնը յայտարարեց, որ Ֆրանսան եւ Իտալիան հանդիպում պիտի պահանջեն ՄԱԿ-ի խաղաղապահ ուժերուն նպաստող եւրոպական երկիրներէն՝ հարաւային Լիբանանի մէջ ԵՈՒՆԻՖԻԼ-ի ուժերը իսրայէլեան բանակին կողմէ յարձակման ենթարկուելու լոյսին տակ:
