Սպանիոյ վարչապետ Փետրօ Սանչեզ ասպատակում որակեց Լիբանանի դէմ իսրայէլեան յարձակումը, պնդելով որ միջազգային ընտանիքը չի կրնար անտարբել մնալ այս վտանգաւոր զարգացումին նկատմամբ: Ան ցաւ յայտնեց նաեւ այս հարցով եւրոպական անհամաձայնութեան առնչութեամբ: «Ակնյայտ է, որ երկիր մը կ’ասպատակէ գերիշխան այլ երկրի մը՝ Լիբանանի հողերը, հետեւաբար, միջազգային ընտանիքը չի կրնար անտեսել տեղի ունեցածը», ըսաւ Սպանիոյ վարչապետը: Եւրոմիութիւնը յայտարարեց մարդասիրական օգնութիւններով բեռցուած վեց օդանաւ Լիբանան ուղարկելու մասին: Եւրոմիութեան յանձնակատար Ուրսուլա վոն տեր Լեյեն հաւաստիացուց, որ իրենք կը կանգնին ճգնաժամէն տուժող անմեղ քաղաքացիներուն կողքին:
Ֆրանսայի Արտաքին գործերու նախարարութիւնը յայտարարեց, թէ 24 Հոկտեմբերին Փարիզի մէջ պիտի գումարուի Լիբանանին աջակցելու նախարարական ժողով մը, որ պիտի կեդրոնանայ մարդասիրական օգնութիւններու փոխանցումին ու ներքին քաղաքական ճգնաժամը յաղթահարելու ջանքերուն վրայ: Փարիզ յայտարարեց նաեւ 50 ֆրանսացի քաղաքացիներ Լիբանանէն տարհանելու մասին:
Իսկ Ռուսիոյ Արտաքին գործերու նախարարութեան բանբեր Մարիա Զախարովա վստահեցուց, որ Հըզպալլա տակաւին կազմակերպուած է եւ հրամանատարական շղթան բնականոն կը գործէ, հակառակ բազում պատասխանատուներու ահաբեկումներուն: Ըստ Զախարովայի, նման կազմակերպուած գործունէութիւն առկայ է նաեւ կուսակցութեան զինեալ թեւին պարագային:
Միացեալ Թագաւորութեան արտաքին գործերու նախարար Տէյվիտ Լամի միջազգային ընտանիքէն պահանջեց յաւելեալ աշախատանք տանիլ՝ զինադադար յայտարարելու Կազայի եւ Լիբանանի մէջ, մարդասիրական օգնութիւն փոխանցելու պաղեստինցիներուն եւ ապահովելու գերեվարուած իսրայէլացիներուն ազատ արձակումը:
