ՖԻՏԷ-ի 17-ամեայ ճատրակիստ Ռոպերթ Փիլիպոսեանին շնորհուած է միջազգային վարպետի կոչումը:
Այս մասին յայտարարած է Հայաստանի ճատրակի ֆետերասիոնը:
«Արարատ Մարզական»ի կողմէ սրտանց կը շնորհաւորենք մեր հայազգի վարպետը, ինչպէս նաեւ Հայաստանի ճատրակի ֆետերասիոնը, նորանոր նուաճումներ մաղթելով հայրենի վարպետներուն ընդհանրապէս եւ Ռոպերթին՝ յատկապէս:
ԿՐԵՓԸԼԻՆԿ – ՏԱՊԱԼԵԼԷ ԵՏՔ ԱՏՐՊԷՅՃԱՆՑԻ ՀԱՍԱԿԱԿԻՑԸ՝ ԶՈՐԻԿ ՅՈՎՀԱՆՆԻՍԵԱՆԸ ԿԸ ՀՌՉԱԿՈՒԻ ԱՇԽԱՐՀԻ ԱԽՈՅԵԱՆ
Ղազախստանի մայրաքաղաք Ասթանայի մէջ տեղի ունեցող «Կրեփըլինկ»ի աշխարհի ախոյեանական մրցումներուն, մինչեւ 15 տարեկաններու 29-32 քկ քաշային դասակարգին մէջ, Արմաւիրը ներկայացնող Զորիկ Յովհաննիսեան, աւարտական գօտեմարտին յաղթելով ատրպէյճանցիին, նուաճեց աշխարհի առաջնութիւնը։
Իսկ իր հայրենակից Մարատ Կարապետեանն ալ դարձաւ արծաթէ մետալակիր։
ՍՓԵՐՑԵԱՆԸ՝ ԼԱՒԱԳՈՅՆ ՖՈՒԹՊՈԼԻՍՏԻ ՅԱՒԱԿՆՈՐԴ
Ռուսիոյ «Փրեմիէր Լիկ»ը նշած է այն ֆութպոլիստներուն անունները, որոնք թեկնածու են Սեպտեմբերի լաւագոյն ֆութպոլիստի կոչումին։
Թեկնածուներու շարքին են Ալեքսէյ Պաթրաքովը, Կոնստանդին Տիւքավինը, Իլէա Սամոշնիքովը, Արտիոմ Թիւպան եւ Էտուարտ Սփերցեանը։ Վերջինս Սեպտեմբերին մասնակցած է 3 հանդիպումներու՝ դառնալով 4 կոլի հեղինակ։
Յաղթողը կ’որոշուի Ռուսաստանի Փ.Լ.-ի «առասպել»ներու, «Մաչ Փրեմիէր» հեռատեսիլի վերլուծաբաններու եւ երկրպագուներու ձայներու շնորհիւ։
«ՈՒԵՖԱ-Ի ԱԶԳԱՅԻՆ ԼԻԿԱ» – ԱՅՍՕՐ՝ ՀԱՅԱՍՏԱՆ-ՖԱՐՕ ԿՂԶԻՆԵՐ
Յաջորդական 3 օրերու վրայ պիտի երկարին ՈՒԵՖԱ-ի Ազգային խումբերու մրցաշարքի 3-րդ փուլի 26 մրցումները: Հայաստանի հաւաքականը, որ թէպէտ յաջողութեամբ մեկնարկած էր այս մրցաշարքը, երկրորդ մրցումին անակնկալ պարտութեամբ սպասողական վիճակի մէջ կը պահէ իր հայրենակիցները: Թէ ինչպիսի՞ ելք կ’ունենայ այսօրուան հանդիպումը դժուար չէ գուշակել: Հայկական նախատեսութիւնը յաղթանակ կ’ըսէ:
Ստորեւ 3-րդ փուլի մրցումներուն յայտագիրը.-
ԱՅՍՕՐ, 10 ՀՈԿՏԵՄԲԵՐ
Մոլտովա x Անտորրա (19:00)
Լաթվիա x Հիւսիսային Մակետոնիա (19:00)
Անգլիա x Յունաստան (21:45)
Ժիպրալթար x Սան Մարինօ (21:45)
Ֆինլանտա x Իրլանտա (21:45)
Աւստրիա x Ղազախստան (21:45)
Իսրայէլ x Ֆրանսա (21:45)
Նորվեկիա x Սլովենիա (21:45)
Ֆարօ Կղզիներ x Հայաստան (21:45)
Իտալիա x Պելճիքա (21:45)
