Ողջունելի քայլով մը, 18-էն 20 Սեպտեմբերին, մեր դարմանատան մէջ տեղի ունեցաւ ներքին հիւանդութիւններու առողջական գանգատներ ունեցող այցելուներու համար յատուկ ծառայողական՝ անվճար նախաձեռնութիւն մը: Այս մասին նախօրօք ծանուցած էինք մամուլով եւ համացանցով:
Հ․Կ․Բ․Մ․-ի դարմանատան տնօրէնութեան համագործակցութեամբ, սոյն մարդասիրական նախաձեռնութիւնը կը վայելէր ԱՄՆ-ի Ֆրեզնոյի Բժշկական Առաքելութեան ընկերակցութեան հովանաւորութիւնը: Իսկ դարմանատանս մէջ անոր իրականացումը վստահուած էր յատուկ այս առիթով Լիբանան առաքուած ներքին հիւանդութիւններու մասնագէտ՝ բժիշկ Կարօ Խաչիկեանին, որուն մէկ օրով կ’ընկերակցէր ոսկրաբուժումի մասնագէտ՝ ֆիզիոթերափիստ բժշկուհի Նունէ Խաչիկեանը:
Հիւր բժիշկը վերոյիշեալ 3 օրերու ընթացքին ամենայն համբերութեամբ առանձին-առանձին ընդունեց տարբեր սեռի եւ համայնքներու պատկանող բազմաթիւ այցելուներ, ծանօթացաւ անոնց առողջական գանգատներուն, հարցուփորձով, քննութիւններով դիմորդներուն փոխանցեց իր թելադրութիւններն ու համապատասխան բուժումները: Սոյն արդիւնաւէտ մարդասիրական նախաձեռնութիւնը դրականօրէն գնահատուեցաւ ինչպէս շրջանի բնակչութեան, այնպէս ալ տարբեր համայնքներու պատկանող եւ նոյնիսկ դարմանատան աշխարհագրական դիրքին անծանօթ բոլոր այցելուներուն կողմէ: Անոնց սրտագին շնորհակալական զգացումները եւ օրհնանքի խօսքերը վարձահատոյց գոհունակութեան մը պարգեւն էր բժիշկին, դարմանատան տնօրէնութեան ու աշխատակազմին:
Այս մարդասիրական նախաձեռնութեան յաջողութեան ուրախ առիթով, կը փափաքինք մեր երախտագիտութիւնը յայտնել երկու բժիշկներուն՝ տոքթ. Կարօ եւ Նունէ Խաչիկեաններուն, մարդոց օգնելու եւ ծառայելու յանձնառութեան մէջ իրենց քրտնաջան աշխատանքին եւ նուիրուածութեան համար։ Մենք նաեւ յատուկ շնորհակալութիւն կը յայտնենք Ֆրեզնոյի Բժշկական Առաքելութեան ընկերակցութեան այս հրաշալի գաղափարը նախաձեռնելու եւ հովանաւորելու համար:
Հ.Կ.Բ.Մ.Ի ՏՆՕՐԷՆՈՒԹԻՒՆ
