Երէկ շարունակուեցան մարդասիրական օժանդակութիւններու ժամանումը Պէյրութ՝ անօթեւան եւ անպատսպար լիբանանցի գաղթական ժողովուրդին զօրակցելու համար: Իրանի «Կարմիր մահիկ»-ի ընկերակցութեան ընդհանուր քարտուղար Մեթամ Աֆշար յայտնեց, որ հաւաքեցին ժողովրդական մակարդակի նիւթական եւ ոչ-նիւթական նուիրատուութիւններ, եւ երրորդ մեծ օժանդակութեան օդանաւը ուղարկուեցաւ Սուրիոյ տարածքով, լիբանանեան պատերազմին տուժածներուն օգնելու համար:
Ան նշեց, որ կը պատրաստուին պատերազմի զոհերու եւ տեղահանուած լիբանանցիներու համար Դամասկոսի մէջ շտապ ապաստանի ճամբար կատարելու, եւ եթէ կարիքը զգացուի «Կարմիր մահիկ»-ի ընկերակցութիւնը ասոր կողքին պատրաստ է դաշտային հիւանդանոց ստեղծելու՝ օգնութիւն ցուցաբերելու համար լիբանանցիներուն:
«ԻՐՆԱ» լրատու գործակալութիւնը հաղորդեց, որ Իրանի ժողովուրդին կողմէ հաւաքուած մարդասիրական օգնութիւնը կ’ընդգրկէ 10 թոն սննդամթերք, բժշկական սարքեր եւ դեղորայք:
Նմանօրինակ մարդասիրական օժանդակութեան օդանաւեր Քաթարէն եւ Ֆրանսայէն էջք կատարեցին Պէյրութի միջազգային օդակայան:
