Հըզպալլայի ընդհանուր քարտուղարի տեղակալ շէյխ Նաիմ Քասեմ պատկերասփռուած ուղերձի ընթացքին ընդգծեց, որ սիոնական կազմակերպութեան եւ Միացեալ Նահանգներու մեծ հանդիպումը իրենց վրայ ճնշում բանեցնելու համար է, որպէսզի վախնան, սակայն ոչ մէկ բան զիրենք կը վախցնէ:
Ան մատնանշեց, որ նահատակ ընդհանուր քարտուղար սեյիտ Հասան Նասրալլայի բացակայութեան իրենց իրավիճակը շատ դժուար է, բայց իրենք ոգեշնչուած են անոր ուժով: Քասեմ բացատրեց, որ «Աքսայի ջրհեղեղ»ը բացառիկ իրադարձութիւն է եւ սկիզբ՝ Միջին Արեւելքի դիմագիծը փոխելու: Ան յայտնեց, որ Համասի եւ ամբողջ Պաղեստինի ժողովուրդի մարտիկներուն պայքարը 100 առ հարիւր օրինական աշխատանք է, եւ աւելցուց, որ բռնագրաւման նպատակը ոչ թէ «Աքսայի ջրհեղեղ»ին արձագանգելն էր, այլ ամբողջութեամբ վերջ տալ դիմադրութեան եւ ոչնչացնել Պաղեստինի ժողովուրդը։ Քասեմ հաստատեց, որ Լիբանանի աջակցութեան ճակատը 11 ամիս հիւծած է թշնամին եւ վտարած վերաբնակիչները հիւսիսէն: Ան նշեց, որ Լիբանանը թիրախաւորուած է, իսկ Իսրայէլի վարչապետ Պենիամին Նեթանիահուն բազմիցս յայտարարած է, որ կը ցանկայ տեսնել նոր Միջին Արեւելք մը, նշելով որ պատմութիւնը ապացուցած է, որ սիոնական կառոյցը վտանգ կը ներկայացնէ տարածաշրջանին եւ աշխարհին համար: Ան յայտնեց, որ «հիւսիսի մէջ գտնուող բնակավայրերը կը գտնուին մեր հրթիռներու շառաւիղին մէջ, եւ մեր կարողութիւնները լաւ են»։ Շէյխ Քասեմ ըսաւ նաեւ, որ «ղեկավարումը, վերահսկումը, կառավարումը եւ դիմադրութիւնը խնամքով կազմակերպուած են, եւ հարուածները յաղթահարած ենք»:
