Վարչապետի պաշտօնակատար Նեժիպ Միքաթի երէկ ընդունեց Քաթարի Արտաքին գործերու նախարարութեան մէջ միջազգային համագործակցութեան պետական նախարար Լուլուա պընթ Ռաշիտ Խաթերը, որուն կ’ընկերակցէր Լիբանանի մէջ Քաթարի դեսպան շէյխ Սաուտ պըն Ապտուլ Ռահման Ալ Թանին եւ անոր ուղեկցող պատուիրակութիւնը:
Ան նախարարին այցելութիւնը նկատեց այն խորհրդանիշը, որ կը հաստատէ Քաթարի պետութեան շարունակական աջակցութիւնը Լիբանանին՝ դիմակայելու այս դժուար պայմանները: Ան իր ողջոյններն ու շնորհակալութիւնը փոխանցեց Քաթարի պետութեան Էմիր շէյխ Թամիմ պեն Համատ Ալ Թանիին՝ Լիբանանի կողքին ըլլալու համար:
Իր կարգին, նախարարը զօրակցութիւն յայտնեց Լիբանանի կայունութեան, ապահովութեան վերահաստատման եւ քննադատեց Լիբանանի քաղաքացիներուն դէմ գործադրուած բռնարարքները: Ան Քաթարի պետութեան ամբողջական աջակցութիւնը յայտնեց Լիբանանին, անոր բանակին, առողջապահական մարզին: Ան ըսաւ, որ Տոհայի եւ Պէյրութի միջեւ օժանդակութեան կամուրջ մը հաստատուեցաւ եւ այս ամսուան ընթացքին Քաթար 10 օդանաւ բժշկական սարքեր եւ սննդամթերք պիտի ուղարկէ:
