Լիբանանի դէմ Իսրայէլի սանձազերծած պատերազմին դադրեցման հրադադարի ջանքերը լիբանանեան եւ միջազգային դիւանագիտական, կրօնական ու քաղաքական մակարդակի վրայ շարունակուեցան նաեւ երէկ, որոնք սակայն ի դերեւ ելան: Միւս կողմէ, Իսրայէլ Պէյրութի հարաւային արուարձաններու եւ հարաւային Լիբանանի մէջ իր թիրախաւորումները եւ օդային թռիչքները նոյն ձեւով շարունակեց: Իսրայէլեան բանակի բանբեր Աւիխայ Ատրահի երէկ պահանջեց ռազմական յաւելեալ զօրքեր՝ հարաւային Լիբանանի մէջ որոշակի գործողութիւն սկսելու համար: Առ այդ 146-րդ խումբը միացաւ մնացեալ խումբերուն եւ գործողութիւնը սկսաւ: Նշենք, որ այս պահեստային խումբը կը կռուի «Հիւսիսային նետեր» արշաւի շրջագիծին մէջ, եւ այս ուժերը կը պատերազմին հրետանային ուժերու հետ՝ բացայայտելու եւ ոչնչացնելու համար Հըզպալլայի ենթակառուցուածքները: Իսրայէլի պաշտպանութեան նախարար Եոաւ Կալանթ յայտնեց, որ Հըզպալլան առանց ղեկավարութեան կազմակերպութիւն է, անոր ընդհանուր քարտուղար Հասան Նասրալլան սպաննուեցաւ, թերեւս իր յաջորդն ալ մաքրագործուեցաւ: Պէյրութի հարաւային արուարձաններուն Ղատիր, Հարըթ Հըրէյք շրջաններուն վրայ իսրայէլեան օդուժը քանի մը յարձակումներ գործեց: Ըստ իսրայէլեան բանակին, Պէյրութի մէջ ճիշդ հարուածով Իսրայէլ սպաննեց Հըզպալլայի սպայակոյտի համակարգի պետ Սուհէյլ Հուսէյն Հուսէյնին: Իսկ Հըզպալլայի ընդհանուր քարտուղարի տեղակալ շէյխ Քասեմի խօսքի պահուն Լիբանանէն Հայֆայի ծոցի ուղղութեամբ 100 հրթիռներ արձակուեցան: Իսրայէլեան բանակը Կոլանի զօրամասէն ուժերով իր հսկողութեան տակ առաւ Հըզպալլայի պատկանող համալիր մը: «Մայատին» հաղորդեց, որ Հըզպալլա մեծ գործողութիւն մը կատարեց Լապւոնայի մօտ իսրայէլեան յատուկ ուժի մը դէմ եւ արձանագրուեցան մեծ թիւով զոհեր եւ վիրաւորներ:
