Տիգրան Սարաֆեան ծնած է 1927-ին, Աղեքսանտրէթէն 25 քմ արեւելք՝ Պէյլանի մէջ: Փոքր տարիքէն անդամակցած է Հ.Մ.Մ.-ի եւ Ս.Դ.Հ.Կ.-ի շարքերուն: Ան 20 տարիներ ստանձնած է Հ.Մ.Մ.-ի Կեդրոնական վարչութեան ատենապետի պաշտօնը, իսկ 1985-2009 տարիներուն վարած է յաջորդաբար հինգ կեդրոնական վարչութիւններու ատենապետութիւնը: Որպէս Հայ Մարմնամարզական Միութեան (Հ.Մ.Մ.) երկարամեայ ատենապետ, իր միութենական առաքելութեամբ ան գտնուած է Հ.Մ.Մ.–ի կազմակերպական գրեթէ բոլոր շրջանները եւ լուրջ աշխատանք տարած է անոր բազմազան յանձնախումբերէն ներս, ամենայն բծախնդրութեամբ եւ պատասխանատուութեան գիտակցութեամբ: Ան իր կեանքին մեծ մասը անցուցած է ՀՄ.Մ.-էն ներս, գլխաւորաբար ծառայելով սկաուտական եւ երիտասարդական շարքերուն:
Տիգրան Սարաֆեան եղած է Սոցիալ Դեմոկրատ Հնչակեան Կուսակցութեան Կեդրոնական վարչութեան եւ Լիբանանի շրջանի Վարիչ մարմինի երկարամեայ անդամ:
Տիգրան Սարաֆեան Լիբանանի քաղաքացիական պատերազմի տարիներուն կարեւոր դերակատարութիւն ունեցած է հայկական թաղամասերու պաշտպանութեան եւ ազգային համերաշխութեան մթնոլորտի պահպանման մէջ: Ատենապետն էր հայկական կուսակցութիւններուն կողմէ յառաջացած «Պատերազմի միացեալ մարմինի»ն: Ան դրական չէզոքութեան քաղաքականութեան կնքահայրերէն մին էր, որուն պատճառով լիբանանահայութիւնը եւ հայկական թաղամասերը նուազագոյն վնասով դուրս եկան:
Եղած է երկարամեայ ազգային գործիչ: Ան Միջին Արեւելքի հայ համայնքներէն ներս երկար տարիներ ծառայեց ի խնդիր սփիւռքահայ երիտասարդութեան հայրենասիրական դաստիարակութեան գործին:
Կեանքի վերջին տարիներուն, բարեբախտաբար, ընկ. Սարաֆեան հասցուց գրել Հ.Մ.Մ.-ի պատմութիւնը: «Հ.Մ.Մ.ի պատմութեան հետքերով» գիրքին գինեձօնը տեղի ունեցած է Հ.Մ.Մ.-ի Շրջանային վարչութեան հովանաւորութեամբ եւ Հ.Մ.Մ.-ի տեղական վարչութիւններուն կազմակերպութեամբ, Ուրբաթ 12 Սեպտեմբեր 2008-ին, երեկոյեան ժամը 8-ին, Կլէնտէյլի Հանրային գրադարանին մէջ: Գիրքը հանգամանօրէն ներկայացուցած է տոքթ. Յարութիւն Սաղրեանը: Իսկ դոկտ. Զաւէն Ա. քհնյ. Արզումանեան ներկայացուցած է հեղինակը եւ իր շնորհաւորութիւններն ու յարատեւ յաջողութեան լաւագոյն մաղթանքները յայտնած:
Ս.Դ.Հ.Կուսակցութեան Կեդրոնական վարչութեան երկարամեայ անդամ, Հ.Մ.Մ.-ի երկարամեայ ատենապետ եւ Հ.Մ.Մ.-ի պատմագիրքերուն հեղինակ Տիգրան Սարաֆեան կը մահանայ 7 Հոկտեմբեր 2020-ին, 93 տարեկանին, Միացեալ Նահանգներու մէջ, Լոս Անճելըս: Երկարամեայ ազգային գործիչ վեթերան ընկերը կը հեռանայ իր ետին ձգելով կուսակցական, ազգային հասարակական ու մարզական բնագաւառներուն մէջ հարուստ ժառանգութիւն մը:
Ամուսնացած է Վարդուհի Սարաֆեան-Թաթուլեանի հետ: Ունի մէկ մանչ՝ Համբարձում Սարաֆեան (այժմ՝ Ս.Դ.Հ.Կ. Կեդրոնական վարչութեան ատենապետ) եւ երկու դուստրեր՝ Նորա Սարաֆեան-Միհրանեան եւ Հուրի Սարաֆեան-Սաթեան:
Երկու վկայութիւն ընկեր Տիգրան Սարաֆեանէն:
Ա. «Հայաստանի անկախացումէն ետք, Տիգրան Սարաֆեան իր ծանօթութիւններուն բերումով կարեւոր դեր ունեցաւ հիմնելու Հ.Մ.Մ.-ը Հայաստանի մէջ»։
Հ.Մ.Մ.-ի Կեդրոնական վարչութեան ատենապետ ՄԻՍԱՔ ՆԱՃԱՐԵԱՆ:
Բ. «Տարբեր ժամանակներու, տարբեր արժէքներու, տարբեր մտքի եւ իմացականութեան, հարուստ փորձառութեան եւ հանդարտաբարոյ նկարագրի տէր լիարժէք հայ մարդ: Յարգանք իր յիշատակին: Կը խոնարհիմ»:
Ամերիկայի Հայ Աւետարանչական ընկերակցութեան Վարչական խորհուրդի գործադիր տնօրէն ԶԱՒԷՆ ԽԱՆՃԵԱՆ:
