Միացեալ Նահանգներու փոխնախագահ եւ նախագահի պաշտօնին ժողովրդավարներու կուսակցութեան թեկնածու Քամալա Հարիս յայտնեց, որ Լիբանանի հարաւային սահմանին վրայ ընթացող առճակատումին դիւանագիտական լուծումը միակ միջոցն է վերահաստատելու երկարատեւ կայունութիւնն ու հանդարտութիւնը: Իսկ արտաքին գործերու նախարար Անթոնի Պլինքըն յայտնեց, որ ժամը հասած է Կազայի մէջ զինադադար հաստատելու, գերեվարուած իսրայէլացիները տուն վերադարձնելու, Իսրայէլի անվտանգութիւնը պահպանելու եւ պաղեստինցիներուն տառապանքը մեղմելու:
Ֆրանսայի արտաքին գործերու նախարար Ժան-Նուէլ Պաղօ յայտնեց, որ «միայն ուժը բաւարար չէ երաշխաւորելու Իսրայէլի անվտանգութիւնը»: Ֆրանսացի նախարարը Երուսաղէմէն յայտնեց, որ ժամը հասած է դիւանագիտութեան, մինչ պատերազմը Կազայէն ընդարձակուած է Լիբանան:
Հռոմի Ֆրանչիսկոս պապը դատապարտեց Միջին Արեւելքի մէջ մոլեգնող բռնութիւնները եւ քննադատեց միջազգային կողմերուն լռութիւնն ու անտարբերութիւնը: Ան պահանջեց անյապաղ զինադադար յայտարարել բոլոր ճակատներուն վրայ՝ ներառեալ Լիբանանի հարաւային սահմանը:
