Յորդանանի արտաքին գործերու նախարար Այման Սաֆատի երէկ այցելեց Պէյրութ ու տեսակցեցաւ վարչապետի պաշտօնակատար Նեժիպ Միքաթիի եւ խորհրդարանի նախագահ Նեպիհ Պըրրիի հետ: Այն Թինէի մէջ տրուած մամլոյ ասուլիսի ընթացքին Սաֆատի յայտնեց, որ Ամման միջամուխ չի դառնար Լիբանանի ներքին հարցերուն, այլ նախագահի ընտրութեան հարցով պարզապէս կ’աջակցի լիբանանցիներուն համաձայնութեան: Սաֆատիի համաձայն, Յորդանան կը շարունակէ աշխատանք տանիլ՝ Լիբանանի դէմ իսրայէլեան ոտնձգութիւնները դադրեցնելու ուղղութեամբ, խոստանալով անյապաղ օգնութիւն տրամադրել լիբանանցիներուն: Նոյն ծիրին մէջ, Արաբական Միացեալ Էմիրութիւններու նախագահ Մոհամմատ պըն Զայէտ Ալ Նահիան պատուիրեց մարդասիրական օգնութիւններով բեռցուած վեց օդանաւ եւս առաքել Լիբանան, աջակցելու զգայուն կացութեան մատնուած լիբանանցիներուն: Քանի մը օր առաջ, Էմիրութիւններ յատկացուցած էր նաեւ հարիւր միլիոն տոլարի նպաստ:
