ՀՀ պաշտպանութեան նախարար Սուրէն Պապիկեան Սեպտեմբերին այցելած է Հարաւային Քորէա՝ ուսումնասիրելու «Hyundai Rotem» ընկերութեան կողմէ մշակուած K2 «Սեւ յովազ» մարտական հրասայլերու ձեռքբերման հնարաւորութիւնը։ Այս մասին յայտնած է «Army Recognition» պաշտպանական նորութիւններու հարթակը՝ յղում ընելով հարաւքորէական «Չոսուն պիզ» լրատուամիջոցին։
ՀՀ պաշտպանութեան նախարարը մասնակցած է 9-10 Սեպտեմբերին Հարաւային Քորէայի Ազգային պաշտպանութեան նախարարութեան եւ Արտաքին գործերու նախարարութեան կողմէ կազմակերպուած արհեստական բանականութեան առնչուող բարձր մակարդակի հանդիպման եւ բանակցութիւններ սկսած է հարաւքորէական զէնքի մատակարարման շուրջ՝ յատուկ հետաքրքրութիւն ցուցաբերելով K2 հրասայլի նկատմամբ։
Հարաւքորէական բանակին կողմէ օգտագործուող K2 մարտական հրասայլը յագեցած է յառաջադէմ արհեստագիտութեամբ, որ յատկապէս արդիւնաւէտ կը գործէ եւ լաւ կը համապատասխանէ լեռնային պայմաններուն։
K2-ը ձեռք բերուած է այնպիսի երկիրներու կողմէ, ինչպիսիք են Լեհաստանը եւ Թուրքիան:
