Ճատրակի հայ վեց վարպետներ ընդգրկուած են FIDE-ի հրապարակած «ռէյթինկի» 100 լաւագոյն անուններու ցանկին վրայ: Տղոց աղիւսակին վրայ կը գտնուին հետեւեալ վարպետները.- Հայկ Մարտիրոսեան՝ 51-րդ, Շանթ Սարգսեան՝ 70-րդ եւ Աբրիէլ Սարգսեան՝ 93-րդ: Իսկ կանանց դասաւորման մէջ Էլինա Դանիէլեան, Լիլիթ Մկրտչեան եւ Աննա Սարգսեան համապատասխանաբար կը զբաղեցնեն 60-րդ, 62-րդ եւ 69-րդ դիրքերը:
Լաւագոյններուն աղիւսակը կը գլխաւորէ աշխարհի նախկին ախոյեան, նորվեկիացի Մակնուս Գարլսընը։
ԱՐԹՈՒՐ ԱԼԵՔՍԱՆԵԱՆԻ ԲՈՂՈՔԱՐԿՄԱՆ ՀԱՐՑԸ ՅԵՏԱՁԳՈՒԱԾ
Փարիզ-2024 Ողիմպիական խաղերու յունա-հռոմէական ոճի 97 քկ քաշային ըմբիշ Արթուր Ալեքսանեան, օրին բողոք ներկայացուցած էր եզրափակիչ մրցումին կատարուած իրաւարարական կոպիտ սխալներուն համար, որուն հետեւանքով ան նուաճած էր արծաթէ մետալ:
Արթուր Ալեքսանեան իր խումբին հետ դիմած էր Լոզանի դատարան եւ 19 Սեպտեմբերին կը սպասէր արդար պատասխանի:
Ըստ ArmLur.am-ի դատարանը այս բողոքագրին որոշումը երկարաձգած է մինչեւ 10 Հոկտեմբերի:
ՈՒՈՅՉԷՔ ՇԵԶՆԻ «ՊԱՐՍԷԼՈՆԱ»-Ի ԲԵՐԴԱՊԱՀ
«Պարսելոնա» ակումբի համակիրներն ու պատասխանատուները վերջապէս կրնան քիչ մը շունչ քաշել, մանաւանդ ախոյեանին վերջին խայտառակ պարտութենէն ետք «Օսասունա»-ի դէմ 2-4 արդիւնքով:
Արդարեւ, կողմերուն միջեւ մէկ տարուան պայմանագրով համաձայնութիւն մը գոյացած ըլլալով, 34-ամեայ լեհ բերդապահ Ուոյչէք Շեզնի պաշտօնապէս պիտի ընդգրկուի քաթալոնեան կազմին մէջ:
Իտալական «Եուվենթիւս»-ի նախկին մարզիկը տակաւին վերջերս՝ Օգոստոսին, յայտարարած էր իր ֆութպոլային կեանքի աւարտին մասին: Սակայն մէկ ամիս անց, «Պարսելոնա»-ի բերդապահ Տէր Շթիկընի ծունկէն վնասուածք ստանալէն ետք, անմիջապէս մոռնալով իր խօսքերը, համաձայնած էր վերադառնալ կանաչ դաշտ:
Արդեօք տարեկան 3 միլիոն եւրոյի շլացնող գումա՞րն է անոր որոշման փոփոխման պատճառը, թէ՞ «Պարսելոնա»-ի համբաւը…:
