Իսրայէլեան ցամաքային գրոհներու լոյսին տակ, ՄԱԿ-ի ընդհանոր քարտուղար Անթոնիօ Կութերեշ յայտնեց, որ «ժամը հասաւ վերջ տալու այս ահաւոր մագլցումին, որ Միջին Արեւելքի ժողովուրդները կ’առաջնորդէ դէպի անդունդ»: Միացեալ Նահանգներու Արտաքին գործերու նախարարութիւնը Ուաշինկթընի «իսկական մտահոգութիւնը» յայտնեց լիբանանեան հողի վրայ Իսրայէլի ցամաքային գործողութեան առնչութեամբ: Իսկ նախագահ Ճօ Պայտըն հաստատեց, որ Ուաշինկթըն պիտի չհամաձայնի Իրանի հիւլէական դիրքերուն դէմ իսրայէլեան որեւէ յարձակումի: Քաթարի Թամիմ պըն Համատ Ալ Սանի իշխանը Իրանի նախագահին հետ տեսակցելէ ետք խոստացաւ յաւելեալ ջանք թափել՝ զինադադար հաստատելու համար: «Մենք Կազայի պատերազմին սկիզբէն ի վեր կը զգուշացնենք Լիբանանի դէմ ոտնձգութիւններու բազմացումէն», ըսաւ իշխանը: Ռուսիոյ արտաքին գործերու նախարար Սերկէյ Լաւրով Միջին Արեւելքի մէջ հակամարտող բոլոր կողմերէն պահանջեց դիմել ինքնազսպումի եւ անյապաղ վերջ տալ պատերազմին:
