Այն Թինէի մէջ երէկ տեղի ունեցաւ եռակողմանի ժողով՝ մասնակցութեամբ խորհրդարանի նախագահ Նեպիհ Պըրրիի, վարչապետի պաշտօնակատար Նեժիպ Միքաթիի եւ Ընկերվար յառաջդիմական կուսակցութեան նախկին առաջնորդ Ուալիտ Ճոմպլաթի՝ քննարկելու լիբանանեան մարտական զարգացումները, երկրին առջեւ ցցուած ճակատագրական մարտահրաւէրները եւ տեղահանուածներուն թղթածրարները: Միքաթի ժողովականներուն անունով դատապարտեց իսրայէլեան բռնարարքները, որոնց հետեւանքով զոհուած են բազմաթիւ լիբանանցիներ: Ժողովէն ետք տրուած մամլոյ ասուլիսի ընթացքին, վարչապետի պաշտօնակատարը լիբանանցիներուն կոչ ուղղեց միասնականութեան եւ համագործակցութեան՝ օգնելու համար տեղահանուած հազարաւոր ընտանիքներուն: Ան նաեւ միջազգային ընտանիքէն եւ կազմակերպութիւններէն պահանջեց աջակցիլ Լիբանանին: Ան յանձնառութիւն յայտնեց անյապաղ զինադադարի կոչ ուղղած միջազգային յայտարարութեան եւ խոստացաւ յանձնառու մնալ ՄԱԿ-ի 1701 բանաձեւին՝ լիբանանեան բանակը տեղակայելով հարաւի մէջ, որպէսզի ԵՈՒՆԻՖԻԼ-ին հետ համագործակցաբար պահպանուի անվտանգութիւնը: Միքաթի մաղթեց, որ այս եռակողմանի ժողովը ընդարձակուի եւ շուտով կարելի ըլլայ ընտրել հանրապետութեան նոր նախագահը:
Վարչապետի պաշտօնակատարը մանրամասն անդրադարձաւ նաեւ Լիբանանի մէջ տեղահանուած ընտանիքներու թղթածրարին, այդ հարցին լուծումը համարելով կառավարական առաջնահերթութիւն: Ընկերային հարցերու նախարարի պաշտօնակատար Հեքթոր Հաժժար իր կարգին նշեց, որ Լիբանան կը դիմագրաւէ մարդասիրական վտանգաւոր մարտահրաւէրներ, որովհետեւ ժամանակաւոր ապաստաններու մէջ տեղաւորուած քաղաքացիներուն թիւը հատած է 150 հազարը եւ անհրաժեշտ է անոնց անյապաղ օգնել:
