Պետութիւններու թուայնացման գործընթացը պէտք է ածանցուի հասարակութեան եւ առեւտուրի համար յարմար ըլլալուն, այլ ոչ թէ հակառակը. այս մասին Եւրասիական տնտեսական համաժողովի լիագումար նիստին ընթացքին յայտնեց Հայաստանի վարչապետ Նիկոլ Փաշինան:
Ան նշեց, որ թուային հասարակութիւն եւ զարգացած տնտեսութիւն կառուցելու համար որոշած են նախ եւ առաջ իրենց թուային ճարտարապետութիւնը ամրագրել երկու սկզբունքներու վրայ՝ վստահութիւն եւ անվտանգութիւն: Թուային գործընթացները պէտք է ըլլան գործնական, արդիական եւ օգտակար՝ մարդոց ու առեւտուրի համար: Իսկ եթէ ասիկա տեղի չունենայ, ուրեմն աս ոչ թէ թուայնացում է, այլ՝ պատրանք, ինչ որ ի հարկէ անօգուտ է: Խօսքը պէտք է ըլլայ պետական ծառայութիւններու աշխատանքի ամբողջական վերափոխման մասին, – ըսած է վարչապետը՝ նկատի ունենալով թուայնացումը:
Փաշինեանի համոզումով՝ կարեւոր է ոչ թէ մասնակի թուայնացում ընել, այլ ստեղծել այնպիսի ծառայութիւններ, որոնք կը համապատասխանեն քաղաքացիներու եւ առեւտուրի կենսական նշանակութիւն ունեցող կարիքներու բաւարարման եւ գործնական արձագանգ կ’ապահովեն կարեւոր իրադարձութիւններուն:
«Թուայնացման ձեւաչափին անցում կատարելու գործընթացին մէջ անհրաժեշտ են յուսալի, ամբողջական տուեալներ: Անիկա թոյլ կու տայ պարզել քաղաքացիներու եւ առեւտուրի փոխադարձ գործակցութիւնը պետական մարմիններու հետ՝ գործընթացը դարձնելով աւելի յարմար, արդիւնաւէտ եւ անվտանգ», – ըսած է Փաշինեան:
Ան նաեւ ընդգծած է, որ տուեալներու վստահելի պահպանման գաղափարը առանցքային կարեւորութիւն ունի Հայաստանի թուային ձեւափոխման գործընթացին:
