Պաքուի մէջ աւարտեցաւ բռնագրաւուած Արցախի Հանրապետութեան ռազմաքաղաքական ղեկավարութեան ներկայացուցիչներու գործով նախաքննութիւնը: Ատրպէյճանը անոնց «պատմամշակութային յուշարձաններու ոչնչացման» մեղադրանք ներկայացուցած է: Այս մասին յայտնեց Ատրպէյճանի գլխաւոր դատախազ Քեամրան Ալիեւ: Ան աւելցուց նաեւ, որ ձերբակալուածներու բոլոր իրաւունքները «պաշտպանուած» են, անոնցմէ իւրաքանչիւրը ունի քանի մը փաստաբան եւ իրաւունք ունի ծանօթանալու գործի
նիւթերուն:
Ատրպէյճանի գլխաւոր դատախազութիւնը քրէական գործեր յարուցած է բռնագրաւուած Արցախի Հանրապետութեան նախկին ռազմաքաղաքական ղեկավարներէն 15-ին նկատմամբ:
Յիշեցնենք, որ 2023 թուականի Սեպտեմբերին Արցախի Հանրապետութեան նկատմամբ Ատրպէյճանի գործած զանգուածային զինուորական յարձակումին պատճառով անոնք ապօրինաբար կալանաւորուած են եւ փոխադրուած Պաքու։ Անոնց դէմ մեղադրանք ներկայացուած է ահաբեկչութեան, ահաբեկչութեան ֆինանսաւորման, օրէնքով չնախատեսուած զինեալ կազմաւորումներ ու խմբաւորումներ ստեղծելու եւ ահաբեկչութեան նպատակով վարժանքներ կատարելու համար։
Այժմ Պաքուի մէջ ապօրինի կալանքի տակ կը պահուին նախկին նախագահներ Արկադի Ղուկասեանը, Բակօ Սահակեանը եւ Արայիկ Յարութիւնեանը, Ազգային ժողովի նախագահ Դաւիթ Իշխանեանը, արտաքին գործերու նախկին նախարար Դաւիթ Պապայեանը, պաշտպանութեան բանակի նախկին հրամանատար Լեւոն Մնացականեանը, նախկին պետական նախարար Ռուբէն Վարդանեանը եւ զինեալ ուժերու սպայակոյտի նախկին պետ Դաւիթ Մանուկեանը:
