Վարչապետի պաշտօնակատար Նեժիպ Միքաթի, ՄԱԿ-ի կազմակերպութիւններու եւ նուիրատու երկիրներու դեսպաններուն հետ վարչապետարանին մէջ հանդիպման ժամանակ, Լիբանանի դէմ իսրայէլեան յարձակման հետեւանքով յառաջացած տեղահանման ճգնաժամին կառավարութեան արձագանգման ծրագրի ծիրին մէջ նշեց, որ այս հանդիպումը կը զուգադիպի այնպիսի ժամանակի, երբ Լիբանանը կանգնած է իր պատմութեան մէջ ամենավտանգաւոր փուլերէն մէկուն դէմ-յանդիման, որովհետեւ շուրջ մէկ միլիոն մարդիկ տեղահանուած են Լիբանանի դէմ Իսրայէլի մղած քանդիչ պատերազմին պատճառով:
Ան յայտնեց, որ իրենք ջանասիրաբար կ’աշխատին ՄԱԿ-ի կառոյցներուն հետ համագործակցելով՝ ապահովելու համար տեղահանուած լիբանանցիներուն հիմնական կարիքները: Միքաթի գնահատեց ՄԱԿ-ի, արաբական եւ քոյր երկիրներու աջակցութիւնը եւ կոչ ուղղեց աւելի մեծ աջակցութիւն ցուցաբերելու՝ հոգալու համար գաղթականներու հիմնական կարիքները:
