Երէկ կէսօրէ ետք իսրայէլեան բանակը Պէյրութի հարաւային արուարձանի Զահրա հիւանդանոցին շրջակայքը օդային յարձակում մը գործեց: Ըստ «Ժատիտ» պատկերասփիւռի կայանին հրթիռը չպայթեցաւ եւ քաղաքացիներէն խնդրուեցաւ հեռու մնալ այդ վայրէն: Աւելի ուշ, երկրորդ օդային յարձակում մը գործուեցաւ հարաւային արուարձանի Ժանտուլին հրապարակի մօտ շէնքի մը վրայ, Քուէյթի դեսպանատան շրջակայքը: Իսկ Հըզպալլա «Ֆատի 4» հրթիռով հարուածեց զինուորական հետախուզութեան «8200» ռազմակայանը եւ Իսրայէլի լրտեսական ցանցի Մոսատի կեդրոնատեղին, որ կը գտնուի Թել Աւիւի մէջ:
Իսրայէլեան օդուժը երէկ յարձակում գործեց պաղեստինեան Այն Հըլուէ գաղթակայանին մէջ, թիրախ ունենալով Լիբանանի մէջ Ֆաթհ շարժումի հրամանատար, հազարապետ-զօրավար Մունիր Մաքտահը, որ ազատեցաւ մահափորձէն, սակայն վեց զոհեր արձանագրուեցան: Նմանօրինակ յարձակում մը գործուեցաւ նաեւ պաղեստինեան Սուրի գաղթակայանին վրայ:
