Երէկ վաղ առաւօտեան, ըստ իսրայէլեան լրատուամիջոցներուն, Իսրայէլի նախարարաց սեղմ խորհուրդի նախարարները պաշտօնապէս վաւերացուցին Լիբանանի մէջ գործողութեան յաջորդ փուլը: Իսրայէլեան բանակը երէկ յայտարարեց, որ իր ուժերը Հարաւային Լիբանանի մէջ սահմանափակ ցամաքային գործողութեան ձեռնարկած են «քաղաքական մակարդակի որոշումին համաձայն»: Սպիտակ տունը իր զօրակցութիւնը յայտնեց այս գործողութեան, իսկ Միացեալ Նահանգներու եւ Իսրայէլի պաշտպանութեան նախարարները համաձայնեցան սահմանի երկայնքին Հըզպալլայի ենթակառոյցները քանդելու հարցով: Իսրայէլեան բանակը յայտնեց, որ 98-րդ զօրքը կը ղեկավարէ ցամաքային յարձակումը:
Իսրայէլեան «Մաարիւ» թերթը բացայայտեց, որ իսրայէլեան բանակի ընտրանի ուժերու չորս խումբեր կ’աշխատին մէկ նպատակի հասնելու համար՝ հիւսիսի բնակիչները անվտանգ վերադարձնել իրենց տուները: Իսրայէլեան բանակը յայտնեց, որ Լիբանանի հարաւի մէջ ցամաքային գործողութիւնը կը կանխէ հիւսիսային սահմանի բնակավայրերուն սպառնացող որեւէ սպառնալիք։ Իր հերթին, իսրայէլեան պատկերասփիւռի 13-րդ կայանը հաղորդեց, որ իսրայէլեան բանակի ուժերը տարբեր վայրերէն ներխուժած են Լիբանանի հետ սահմանային պատը եւ սկսած են ներթափանցել դէպի մօտակայ գիւղերը:
Միւս կողմէ, Հըզպալլայի տեղեկատուական գրասենեակի պատասխանատու Մոհամետ Աֆիֆ «Ժազիրա»-ին յայտնեց, որ սիոնական բոլոր պնդումները, թէ իսրայէլեան ուժերը Լիբանան մուտք գործեցին, սուտ են:
