Նուրբ եւ զգայուն այս պահուն Լիբանան կը գուժէ սեյիտ Հասան Նասրալլայի եւ անոր ընկերներուն նահատակութիւնը, որոնք միացան Պաղեստինի ժողովուրդի իրաւունքներու պաշտպանութեան համար զոհուած նահատակներու շարասիւնին:
Սեյիտ Հասան Նասրալլայի նահատակութեամբ Լիբանան կորսնցուց պատմական անձնաւորութիւն մը, որ երկար պիտի ապրի դաշնակիցներու, այլախոհներու եւ նոյնիսկ իսրայէլեան թշնամիին յիշողութեան մէջ:
Սոցիալ Դեմոկրատ Հնչակեան Կուսակցութեան Լիբանանի Շրջանի Վարիչ Մարմինը խստօրէն կը դատապարտէ Նասրալլայի սպանութիւնը եւ Իսրայէլի թշնամական գործողութիւնները Լիբանանի եւ անոր ժողովուրդին դէմ։ Վարիչ Մարմինը լիբանանցիներուն կոչ կ’ընէ այս դժուար փուլը յաղթահարելու միասնութեամբ եւ համերաշխութեամբ, հեռու մնալով ժամանակաւոր քաղաքական տարաձայնութիւններէն, յատկապէս այս պահուն, երբ թշնամին մեր հայրենիք Լիբանանը ցամաքային, ծովային եւ օդային շրջափակման տակ պահելով կը պատրաստուի ցամաքային ներխուժում կատարելու:
Ս.Դ.Հ.Կ. Լիբանանի Շրջանի Վարիչ Մարմին
Պէյրութ, 28 Սեպտեմբեր 2024
