Հանրային ուշադրութեան սպասումը երկար չտեւեց եւ Շաբաթ կէսօրէ ետք Հըզպալլա յայտարարութեամբ մը գուժեց իր ընդհանուր քարտուղար սեյիտ Հասան Նասրալլայի նահատակութիւնը, որ պատահեցաւ Ուրբաթ, 27 Սեպտեմբերին, Լիբանանի հարաւային արուարձանին մէջ իսրայէլեան բուռն հրթիռակոծման հետեւանքով:
Հըզպալլա հաղորդագրութեան մէջ յայտնեց, որ սեյիտ Նասրալլա 30 տարի կուսակցութիւնը ղեկավարեց՝ արձանագրելով իրերայաջորդ յաղթանակներ, հերոսաբար պաշտպանելով Լիբանանի ժողովուրդը եւ զօրակցելով Պաղեստինեան դատին:
Հաղորդագրութեան մէջ ըսուեցաւ նաեւ, որ Հըզպալլայի ղեկավարութիւնը ամենավեհ, ամենասուրբ, եւ ամենաթանկ իր նահատակին կը խոստանայ շարունակել զոհողութիւններով ու նահատակներով լի ճանապարհը եւ պայքարը թշնամիին դէմ՝ յանուն Կազայի ու Պաղեստինի աջակցութեան, յանուն Լիբանանի: «Սեյիտ Նասրալլա ֆիզիքապէս հեռացաւ, բայց պիտի մնայ մեր մէջ իր միտքով, ոգիով եւ պայքարողի սրբազան ուղիով», ըսուած էր հաղորդագրութեան մէջ:
