Ուրբաթ երեկոյեան Պէյրութի հարաւային արուարձանները ցնցեց ուժգին պայթումին մասին կատարուեցան կանխատեսումներ, որ թիրախը Հըզպալլայի մեծ ղեկավարի մըն է: Շրջանառութեան մէջ դրուեցան կարգ մը տեղեկութիւններ, յատկապէս իսրայէլեան աղբիւրներէ, որոնց կարգին իսրայէլեան բանակի հրամանատարին յայտարարութիւնը, որ այս մեծ պայթումին թիրախը Հըզպալլայի ընդհանուր քարտուղար սեյիտ Հասան Նասրալլան էր, որ այդ ժամերուն ժողովի մը մասնակցելու համար կը գտնուէր Պէյրութի հարաւային արուարձան: Սակայն լիբանանեան լրատուամիջոցներն ու մասնաւորաբար Հըզպալլան լուռ մնաց այս լուրին առնչութեամբ: Այս իմաստով, լիբանանցիներ եւ արաբական ու համաշխարհային հետեւորդներ փութով սպասեցին Հըզպալլայի պաշտօնական հաղորդագրութեան՝ ստուգելու համար ցաւալի լուրին իրաւացիութիւնը:
