Յորդանանի ֆիլմի յանձնաժողովը բեմադրիչ Սարին Հայրապետեանի «Իմ քաղցր երկիրը» վաւերագրական ֆիլմը ընտրած է՝ զայն ներկայացնելու «Օսքար»-ի 97-րդ մրցանակաբաշխութեան «Լաւագոյն միջազգային ֆիլմ» կարգին մէջ:
Վաւերագրական ֆիլմը կը պատմէ 11-ամեայ Վրէժի մասին, որ կ’երազէ ատամնաբուժ դառնալ Արցախի մէջ գտնուող իր գիւղին մէջ։ Երբ պատերազմը կրկին կը բռնկի, Վրէժը ընտանիքին հետ կը փախչի, իսկ պատերազմի աւարտէն յետոյ կրկին կը վերադառնայ աւերուած հայրենիք: Վրէժը միաժամանակ կը դիմակայէ նոր դաժան իրողութիւնները, կը պատրաստուի ապագայ մարտերուն, կը պայքարի իր «վէրք»երուն դէմ:
«Իմ քաղցր երկիրը» ֆիլմի առաջին ցուցադրութիւնը տեղի ունեցած է այս տարուան սկիզբը Sheffield DocFest-ի մէջ, այն նաեւ ցուցադրուած է Ամմանի միջազգային ֆիլմի փառատօնին, ուր արժանացած է դատական կազմի մրցանակին որպէս լաւագոյն լիամեթրաժ վաւերագրական ֆիլմ, եւ FIPRESCI մրցանակին՝ որպէս լաւագոյն լիամեթրաժ արաբական վաւերագրական ֆիլմ:
Սարին Հայրապետեանը ծնած է Յորդանան, այժմ կը բնակի Նիւ Եորք:
