Ատրպէյճանի Արտաքին գործերու նախարարութիւնը հերթական անգամ ջղաձգուած է: Ատրպէյճանի ԱԳՆ մամուլի ծառայութեան ղեկավար Այխան Հաճիզատէն Ֆրանսայէն կը պահանջէ վերջ դնել «տարածաշրջանին մէջ ապակառուցողական գործունէութեան»՝ մեկնաբանելով Ֆրանսայի նախագահ Էմանուէլ Մաքրոնի յայտարարութիւնները առ այն, որ «Ֆրանսան ուս-ուսի կանգնած է Հայաստանի հետ՝ անոր վրայ ճնշումներու եւ Ատրպէյճանի տարածքային յաւակնութիւններու լոյսին տակ»։
«Ֆրանսայի նախագահ Էմանուէլ Մաքրոնի յայտարարութիւնները Սեպտեմբեր 25-ին ՄԱԿ-ի Գլխաւոր Վեհաժողովին ելոյթի ժամանակ կը հանդիսանան Ֆրանսայի կողմնակալ հայանպաստ մօտեցման եւս մէկ օրինակ ինչպէս մեր երկրին, այնպէս ալ ամբողջ խաղաղութեան գործընթացին նկատմամբ»,- իր մեկնաբանութեան մէջ կ’ընդգծէ Ա. Հաճիզատէն։
Անոր խօսքով՝ «անընդունելի է, որ Ֆրանսան, որ Երեւանը վրէժխնդրութեան կը նախապատրաստէ եւ կը սպառազինէ այդ երկիրը, ատրպէյճանական կողմը կը մեղադրէ ճնշման մէջ»։
