«Արարատ» օրաթերթի նորանշանակ տնօրէնին հետ ծանօթացումի տեսակցութիւններուն ծիրին մէջ, Սոցիալ Դեմոկրատ Հնչակեան Կուսակցութեան Լիբանանի Շրջանի Վարիչ Մարմինի ատենապետ ընկ. Վանիկ Տագէսեան ու Սոցիալ Դեմոկրատ Հնչակեան Կուսակցութեան Լիբանանի Շրջանի Վարիչ Մարմինի մամլոյ եւ տեղեկատուութեան դիւանապետ ընկ. Լութֆիկ Կօտալազեան այցելեցին Լիբանանի հայոց թեմի բարեջան առաջնորդ Գերշ. Տէր Շահէ արք. Փանոսեանին եւ Մ.Ա.Հ.Ա.Ե.Մ. նախագահ Վեր. դոկտ. Փօլ Հայտոսթեանին, ընկերակցութեամբ «Արարատ» օրաթերթի տնօրէն ընկ. Նազօ Ճէրէճեանին:
Զոյգ հանդիպումներուն ընթացքին արծարծուեցան լիբանանեան եւ գաղութային ընդհանուր զարգացումները՝ իսրայէլեան կործանարար յարձակումներու լոյսին տակ: Ժողովականները քննարկեցին այս զգայուն օրերուն լիբանանահայութեան դիմագրաւած մարտահրաւէրները եւ զանոնք անյապաղ լուծելու ուղղութեամբ ներդրուած ջանքերը: Անդրադարձ եղաւ Լիբանանի հարաւային շրջաններէն տեղահանուած տասնեակ հազարաւոր քաղաքացիներուն օգնելու ջանքերուն:
Առաջնորդ Սրբազանն ու Վեր. Հայտոսթեանը ընդգծեցին հայ մամուլին կարեւոր դերակատարութիւնը հայ համայնքի կեանքին մէջ, իրենց աջակցութիւնը յայտնեցին անոր յարատեւութեան եւ կոչ ուղղեցին միշտ կառչած մնալու անոր առաքելութեան, գնահատելով հայ մամուլի աշխատակիցներուն նուիրեալ գործը: Անոնք ողջունեցին «Արարատ»-ի աշխատանքն ու յարատեւ յաջողութիւն մաղթեցին օրաթերթին, անոր նորանշանակ տնօրէնին ու պաշտօնէութեան:
ՍԴՀԿ-ի Մամլոյ եւ Տեղեկատուութեան Դիւան
