Երէկ շարունակուեցան միջազգային մակարդակի վրայ Լիբանան- Իսրայէլ սահմանին վրայ զինադադար հաստատելու կոչերն ու ջանքերը: Արդարեւ Միացեալ Նահանգները, Աւստրալիան, Գանատան, Եւրոպական Միութիւնը, Ֆրանսան, Գերմանիան, Ճափոնը, Իտալիան, Սէուտական Արաբիան եւ Արաբական Միացեալ Էմիրութիւնները կոչ ուղղեցին 21 օրուան տեւողութեամբ զինադադար հաստատելու: Անոնք նշեցին, որ Լիբանանի դէմ Իսրայէլի կողմէ շարունակուող զանգուածային օդային յարձակումներուն հետեւանքով բազմաթիւ խաղաղ բնակիչներ զոհուեցան եւ վիրաւորուեցան: Յայտարարութեան մէջ ըսուած է, որ իրավիճակը Լիբանանի եւ Իսրայէլի միջեւ աւելի լայն տարածաշրջանային ընդարձկման վտանգ կը ներկայացնէ, աւելցնելով որ ժամանակը հասած է սահմանային շրջաններու բնակիչներուն իրենց խաղաղ տունդարձը երաշխաւորելու։
Համատեղ յայտարարութիւնը ստորագրած երկիրները յայտարարած են, որ պատրաստ են դիւանագիտական աջակցութիւն ցուցաբերելու՝ համաձայնութեան հասնելու համար, որ վերջ պիտի տայ Լիբանանի եւ Իսրայէլի միջեւ ճգնաժամին։
Ամերիկացի պաշտօնատարները իրենց լաւատեսութիւնը յայտնեցին այս ուղղութեամբ: Միւս կողմէ Իսրայէլի ընդդիմութեան ղեկավար Եայիր Լափիտ ըսաւ, որ Իսրայէլ պէտք է ընդունի զինադադարի առաջարկը, այն պայմանով որ միայն 7 օրուան համար ըլլայ, որպէսզի Հըզպալլային չարտօնէ իր ղեկավարման համակարգը վերականգնել: Ան յայտնեց նաեւ, որ պիտի չընդունին որեւէ առաջարկ, որ Հըզպալլային հեռացումը իրենց սահմաններէն չ’երաշխաւորեր:
Լափիտ նշեց, թէ որեւէ առաջարկ, որ կը ներկայացուի, պէտք է թոյլ տայ հիւսիսի բնակիչներուն անյապաղ վերադառնալ իրենց տուները, եւ ատիկա պէտք է յանգի պատանդներու բանակցութիւններու վերսկսման, եւ որեւէ խախտում պիտի յանգեցնէ անոր, որ Իսրայէլը յարձակի իր ամբողջ ուժով Լիբանանի բոլոր շրջաններուն մէջ:
Ամերիկեան-ֆրանսական առաջարկին լոյսին տակ, Նիւ Եորքի մէջ բանակցութիւններուն հետեւող աղբիւրներ երէկ կէսօրէ առաջ «Էմ.Թի.Վի.»-ին յայտնեցին, որ դիւանագիտական ջանքերը յառաջընթաց կ’արձանագրեն եւ շուտով զինադադար կ’ակնկալուի:
