Երէկ կէսօրէ ետք շուրջ ժամը 3:00-ին, Իսրայէլ օդային յարձակում մը գործեց Պէյրութի հարաւային արուարձանին մէջ գտնուող շէնքի մը վրայ: Իսրայէլեան բանակը հաղորդեց, որ յարձակումին թիրախը Հըզպալլայի անօդաչու թռչող սարքերու զօրամասի հրամանատարն է: Յարձակումը կատարուեցաւ «ԷՖ-35» ռմբաձիգ օդանաւով, ըստ նոյն աղբիւրին: Իսրայէլեան բանակը նշեց, որ գնահատականները հարաւային արուարձաններուն մէջ ահաբեկչական գործողութեան յաջողութիւնը կը փաստեն:
Նշենք, որ յարձակման ենթարկուած շէնքը կը գտնուի Հատի Նասրալլա մայրուղիին մօտ գտնուող Ռուէյս խաչմերուկին վրայ: Մեծ վնասներ կրած են նաեւ մերձակայ շէնքերը: Ըստ «Սքայ Նիուզ»-ի յարձակման թիրախը հրամանատար Մոհամմատ Հիւսէյն Սրուրն է: Ապահովական աղբիւրներ «Ռոյթըրզ» լրատու գործակալութեան յայտնեցին, որ հրամանատարը մահացած է:
Լիբանանի Առողջապահութեան նախարարութիւնը հաղորդեց, որ նախնական տուեալներով Հարաւային արուարձանին վրայ յարձակումին հետեւանքով արձանագրուած են երկու զոհ եւ տասնհինգ վիրաւոր:
Երէկ երեկոյեան Ալէյի Քահհալէ շրջանին մէջ ինքնաշարժի մէջ պայթում մը տեղի ունեցաւ, որ պատճառեց մէկ վիրաւոր:
Յայտնենք, որ երէկ դարձեալ իսրայէլեան օդանաւեր Պէյրութի վրայ խզեցին «ձայնի պատ»-ը:
Մարդկային իրաւանց սուրիական դիտարանը նշեց, որ Լիբանանի վրայ իսրայէլեան յարձակումներուն հետեւանքով 103 սուրիացի տեղահանուածներ, որոնց մէջ 32 մանուկներ զոհուեցան:
ԱՖՓ լրատու գործակալութիւնը հաղորդեց, որ աւելի քան 22.000 անձեր, մասնաւորաբար սուրիացիներ իսրայէլեան յարձակումներուն պատճառով Սուրիա մեկնեցան:
Կրթութեան նախարարի պաշտօնակատար Ապպաս Հալապի հարցազրոյցի մը ընթացքին սեփական վարժարաններուն կոչ ուղղեց դպրոցական տարեշրջանի վերամուտը յետաձգելու: Աւելի ուշ ան յայտնեց, որ սեփական վարժարաններուն փոխանցած է, որ վերամուտը մինչեւ 7 Հոկտեմբեր պէտք է երկարաձգել:
