Լիբանան-Իսրայէլ պատերազմական իրավիճակի սրումը արագացուց Նիւ Եորքի մէջ ՄԱԿ-ի Ընդհանուր ժողովին առընթեր դիւանագիտական ջանքերը՝ զինադադար հաստատելու եւ լուծումներ որոնելու առումով: «Էսոշիէյթըտ Փրես» լրատու գործակալութիւնը հաղորդեց, որ վարչապետի պաշտօնակատար Նեժիպ Միքաթի ստորագրած է զինադադարի մասին համաձայնագիրի առաջարկը, Նիւ Եորքի մէջ Միացեալ Նահանգներու արտաքին գործերու նախարար Անթոնի Պլինքընի եւ ամերիկացի պատուիրակ Էյմըս Հոքշթայնի հետ հանդիպումէն ետք: Գործակալութիւնը պարզեց, որ Ծոցի երկիրներու համագործակցութեան խորհուրդի արտաքին գործերու նախարարներուն հետ հանդիպման ժամանակ Պլինքըն կապ հաստատած է Քաթարի վարչապետ Մոհամմատ Պըն Ապտուլ Ռահման Ալ Թանիի եւ Սէուտական Արաբիոյ արտաքին գործերու նախարար Ֆայսալ Պըն Ֆարհանի հետ՝ խնդրելով անոնց հաստատել համաձայնագիրը եւ ստացած է անոնց համամտութիւնը: Աւելի ուշ, վարչապետի պաշտօնակատարի գրասենեակը հերքեց, թէ ան Պլինքընի եւ Հոքշթայնի հետ հանդիպելէ ետք ստորագրած է զինադադարի համաձայնութիւնը:Ngar mikati
Միւս կողմէ, երէկ շարունակուեցան իսրայէլեան յարձակումներն ու բռնարարքները հարաւի, Պեքաայի, Հերմելի, Լապուէի եւ Նապաթիէ շրջաններուն մէջ: Արձանագրուեցան զոհեր եւ վիրաւորներ:
Ngar Nabatiye
Իր հերթին, Հըզպալլա կ’ընդլայնէ իր հրթիռային յարձակումները դէպի իսրայէլեան բնակավայրեր եւ իսրայէլեան բանակի կեդրոններ, որոնք վերջին օրերուն հասած են Հայֆա եւ Թել Աւիւ:
Իսրայէլեան բանակը յայտարարեց, որ տասնեակ հրթիռներ արձակուած են Աքրայի եւ Հայֆա քաղաքի ուղղութեամբ։
«Իսրայէլ Հայոմ» թերթը պարզաբանած է, որ յայտնաբերած են մօտ 30 հրթիռ, որոնք արձակուած են Աքրի ու անոր շրջակայքին ուղղութեամբ։
Իսրայէլեան պաշտօնատարները կոչ ըրին հիւսիսային Կոլանի, Քիրիաթ Շմոնայի եւ Գալիլիոյ բնակիչներուն մնալու ապահով վայրերու մէջ:
